Marylin Moses: tabatin bastante rumor ayera sirkulando ku Moses lo te siguiente minister. Ayera , MFK a desmentí esaki.

Punda—Dorothy Janga a entrega su retiro na Gobernadó Lucille George Wout, lokual ta habri oportunidat pa un kandidato nobo bira minister. Durante e siman aki tabatin dos nòmber menshoná, ku ámbos a keda rechasá pa fuentenan den seno di MFK

E promé nòmber sirkulando tabata eks lider di partido Movementu Progresivo i eks parlamentario Marylin Moses. Moses su nòmber a keda menshoná den seno di MFK, despues ku lider polítiko di MFK, Pik Pisas a buska sosten den e tolda blanku pa súplika retiro di Dorothy Janga. Un di dos nòmber ku tambe a keda menshoná, tabata Vanessa Eliza, eks miembro di Partido PAS ku Charles Cooper tabata lider. Despues ku na mei yüni 2017, tabatin un intento di integrashon entre PAS, Cooper i MFK, Vanessa Eliza tabata esun kende a sigui kordiná e partido PAS pa un tempu korto komo e tabata sekretario general. E tabata sekretario general di e partido i a yega di traha ku Cooper. Vigilante a puntra Charles Cooper si Eliza tabata kandidato pa bira minister, e no a duna niun komentario i desmentí e informashon.  Entretantu despues ku Dorothy Janga a entrega su retiro, a keda kumbini ku Javier Silvania ta sigui komo minister interino pa Salubridat Públiko.