Pashèntnan ta bai haña un chèns pa hasi operashon na Advent hospital.
WILLEMSTAD – Inspektor di Salubridat a duna instrukshon na Curaçao Medical Center (CMC) pa manda tur pashènt Advent Ziekenhuis, ku ta wardando mas ku 6 siman kaba riba lista di espera pa operashon i análisisnan radiológiko. Di e manera akí e pashèntnan por kuminsá haña e atenshon médiko nesesario denter di 2 siman.
E situashon pa ku personal na CMC no ta birando mihó i e lista di espera tampoko lo baha asina, pero aparentemente lo sigui subi. I ya komo Advent Ziekenhuis si tin espasio pa e pashèntnan di operashon i radiologia, Inspektor di Salubridat a disidí ku mester hasi e kambio. Naturalmente CMC mester manda tur e informashonnan nesesario pa Advent; e interkambio di informashon mester tuma lugá sin niun problema na bienestar dje pashènt. Ta suponé ku esaki mester kana bon, pasó CMC i Advent tin konekshon digital pa basta tempu kaba. Un yamada pa informashon adishonal tambe lo ta lógiko.