Betesda ta lamenta ku Minister di Finansa a trata di pinta nan malu riba ret sosial.
Willemstad—–Gerensha i staf di fundashon Stichting Verpleeghuizen Curaçao, SVC (mihó konosí komo Kas di Enfermeria Betèsda) ta lamentá ku ekspreshonnan riba ret soshal a trese duda den maneho di uso di sènnan risibí komo supsidio di nos komunidat for di Ministerio di Salubridat, Medio ambiente i Naturalesa.
Di mes ta lamentá tambe e impakto ku e ekspreshonnan di duda a pone riba nos instituto, nos empleadonan i nos habitantenan ku nan respektivo famia.
E supsidio di e suma di ANG 2.013.000,= ku nos fundashon a risibí ta destiná pa hasi diferente aktividat i pa kompra di diferente produkto manera ilustrá aki bou i manera konbení den e Ministeriële beschikking (MB) nr. 2023/024884 di e Ministerio di Salubridat, Medio ambiente i Naturalesa fecha 15 yüni 2023.
Aktividat/produktonan | Suma (ANG) |
Deshasí di mantenshon atrasá (di edifiso, elektrisidat, èts.) | 613.000 |
Kompra di materialnan nobo (inventario, sistema di komunikashon, ets.) | 1.250.000 |
Kompra di un bus di transporte | 150.000 |
Total | 2.013.000 |
Durante e último seis (6) lunanan nos fundashon a logra debidamente na ehekutá diferente di e aktividatnan den e lista, entre otro fèrfmentu di e parti paden di e edifisio i a kumpra diferente artikulonan , manera ròlstoel i kama pa nos habitantenan i alabes e aparatonan nesesario pa e sistema nobo di komunikashon ku mester wòrdu instalá. Pa ta eksakto nos tin te ku awe fin di febrüari 2024 un suma total di ANG 1.065.880,03 pagá na aktividatnan i kompra di produktonan realisá. E restu di sèn di supsidio ta pendiente pa wòrdu pagá ora ku e trabounan finalisá, ora ku sobra produktonan wòrdu entregá i/o kumprá. Athunto nos a pone un spesifikashon (wak anekso) di e uso di e sèn risibí komo supsidio den kual por mira tambe ku tin un saldo di ANG 4.940,75 ku nos organisashon mes lo kubrí.
Konforme e MB ariba menshoná nos fundashon mester responsabilisá e uso di e supsidio entregando un relato por eskrito no mas tarda ku 30 di aprel 2024.
Nos di fundashon SVC a bin atraves di e delaster añanan aki ta traha duru i kontinuo riba mehorashon di nos kalidat di kuido i riba e imagen di nos organisashon. E ekspreshonnan riba ret soshal ta aportá na daña e reputashon di nos organisashon riba un manera inhustu. Eskpreshonann aki tabatatin i lo tin un impakto grandi riba nos empleadonan ku tur dia di nobo ta bin laborá den nos organisashon pa duna na nos habitantenan e kuido nesesario ku hopi amor i dedikashon. Sin duda algun e ekspreshonnan aki tambe a afekta nos habitantenan i nan respektivo famia i tambe nos klientenan potenshal.
Nos ta konfia ku den futuro nos lo por tin dialogo konstruktivo pa por hiba kombersashonnan den kual lo por haña klaridat i evitá mal komprendimentu di moda ku no mester trese ningun intrakilidat inesesario.
Konfiando riba koperashon positivo di nos prensa, nos huntu ku nos trahadónan i klientenan di “Kas di Enfermeria Betèsda” ta gradisí boso i komunidat den su totalidat pa boso sosten. Pa kualke pregunta por tuma kontakto ku sra. M. Harms, sekretaria di director SVC na telefòn 868-4044 of via e-mail na [email protected].