Willemstad, — Djasabra dia 22 di desèmber a inougurá buelo di Punta Cana pa Kòrsou. Jonny Andersen Chief Executive Officer di Curaçao Airport Partners a kompartí ku ta gradesido pa terminá 2023 di e forma aki ku un buelo inougurá mas.

Ta yama buelo di Air Century, konektando Kòrsou ku Punta Kana, Repúblika Dominikana. Ku e buelo aki ta agregá un otro destinashon na nos lista largu di buelonan na CUR Airport. Jonny Andersen a kompartí ku Repúblika Dominikana ta un destinashon faborito di hopi hende di Kòrsou i awor esaki a bira aksesibel.

Gimenez Executive Vice President, a kompartí ku ta agradesido ku pa promé biaha Kòrsou a keda konektá na Punta Cana, Repúblika Dominikana. Esaki ta desaroyo sostenibel pa e merkado regional. Pues e buelonan ta trese kolaborashon i union den e merkado di region.  Minister Ruisandro Cijntje a kompartí ku e ta orguyoso pa ekstendé e merkado di ekonomia. Ta selebrá dos buelo inougural pa Kòrsou den ménos ku un siman.

Minister di ekonomia a kompartí ku ke enfoká riba diversifikashon di industria kual ta vital pa ekonomia di Kòrsou. Minister Cijntje ta kompartí ku pa 30 aña a pone konfiansa den Kòrsou atrobe ku introdukshon di e ruta Kòrsou pa Punta Cana. Minister di ekonomia a duna di konosé ku ta spera ku mas turista ta bishita isla di Kòrsou i tambe biaha bai Repúblika Dominikana. Minister Cijntje i MEO ta gradesí CTB, CUR Airport Partners, CUR Airport Holding i otro stakeholders, i tambe e ministerionan konserní pa e kolaborashon aki.

E buelo anterior ku a keda inougurá tabata e buelo di Surinam Airways da 18 di desèmber. Anteriormente a firma un MOU pa ekspandé rutanan di aviashon, pero tambe pa fortalesé e vínkulo entre Sürnam i e otro paisnan Aruba, Kòrsou i Miami. E akuerdo di aviashon aki ta pa e rutanan nobo Paramaribo – Aruba – Kòrsou – Miami i vise versá. Pues ku e rutanan nobo aki ta sperá di fomentá e kolaborashon entre paisnan den region i trese mas konekshon entre e paisnan i tambe promové komersio entre e paisnan.