Ántes por a asta drenta riba tereno di Campo ku bo vehíkulo.

Seru Fortuna,– Segun historia di Campo Alegre, kompleho a keda konstruí den aña 1948 i riba 30 di mei, 1949 e portanan di e kompleho di prostitushon a habri riba forma ofisial.

Campo a alegre a keda fundá den aña 1949 ku sosten dje gobièrnu ku tabata maneho e pais durante e añanan despues di segundo gera mundial. For di e tempu ei e resòrt tabata wòrdu konsiderá komo un atrakshon konosí den e área karibense i Latino Amerika. Banda di e rekonosementu internashonal, Campo Alegre a kuminsá haña un ròl esensial den komunidat di Kòrsou segun histórikonan.

Sinembargo e resòrt di prostitishon tabata risibí atenshon internashonal den medionan di komunikashon kaminda e resòrt a asta wòrdu usá komo inspirashon den literatura manera e produkshon “Dubbelspel” dor di eskritor renombrá, Frank Martinus Arion. Alabes e resòrt a tabata sentro di diskushon riba nivel sientífiko tambe.

Na komienso di añanan 1900, meskos ku otro paisnan karibense, Kòrsou tambe tabata tin su problemanan ku prostitushon no regulá. Mas aleu, a resultá ku den añanan 30 i 40 e situashon a sali kompletamente for di man den nos sentro di siudat, Punda i Otrobanda. Segun informashon, den e añanan ei, tabata tin miles di hòmber ku tabata yega Kòrsou pa trabou ku tabata tin nesesidat íntimo. E yegada di e hòmbernan entre otro via di refeneria Shell tabata trese basta problema den nos sentronan di siudat mirando ku e damanan tabata ehersé nan trabou dilanti hendenan “desente”.

Muchanan di skol tabata wak klaramente komo damanan tabata prostituí den kayanan di Willemstad i kon e damanan aki tabata risibí kliente den dia kla. Sinembargo, hende muhénan atraktivo ku no tabata prostituta, tabata molestiá riba kaya dor di hòmbernan fuma.

Den promé instante e gobièrnu na poder a trata na prohibí prostitushon, pero e akshon di prohibishon no a duna resultado deseá. E prohibishon a sòru ku prostitushon a sali for di Punda i Otrobanda, pero a muda pa barionan manera Marie Pampoen i St Michiel. Mas aleu, e prohibishon a resultá ku taksistanan tabata transportá damanan prostituta pa bai klientenan mirando ku den Punda i Otrobanda e trabou aki no tabata posibel mas.

Un otro efekto di prohibishon di prostitushon a sòru tambe ku mondinan tabata yená ku kòndòm usá debí ku no tabata tin un área seif pa trabounan íntimo.

E situashon di prostitushon na Kòrsou a sali kompletamente for di man, kaminda e gobièrnu ku su lomba kontra di muraya, a bai sinta na mesa ku outoridatnan pa wak kiko por pa hasi pa regulá prostitushon na Kòrsou. A papia entre otro pa prohibí damanan di afo pa drenta Kòrsou, pero mesora e posibilidat aki a baha for di misa mirando ku e tabata un “mal idea”.

Despues di basta konsulta, a bini ku e solushon pa traha un resòrt kaminda prostitushon lo tuma lugá den un área destiná. E resòrt lo bira un kompleho di apartamentu “spesial” kaminda e damanan lo wòrdu obligá na hür un kamber unabes na yega Kòrsou ku meta pa traha den prostitushon. E doño di e kompleho konosí komo Campo Alegre, riba su turno lo no intervení den kosnan ku ta sosodé den e kamber ku a wòrdu di hür. E idea di un resòrt spesialisá lo evitá prostitushon klandestino ku tabata tuma lugá den kayanan di Kòrsou.

Alabes, e benefisionan tabata opvio, dor di konsentrá tur aktividat di prostitushon den un área destiná, e públiko en gerenal lo no mester eksperensiá aktividatnan bulgar den kaya. Tambe, tur dama ku ta laborá den e resòrt lo risibí kuido médiko pa asina evitá plamamentu di malesanan seksual. I por último outoridatnan por kontrolá seguridat di e damanan tambe muchu mas mihó, mirando ku e konsentrashon di aktividatnan íntimo ta keda konsentrá den un área destiná.

Basá riba e konsehonan riba mesa, gobièrnu a opta pa konstruí 25 edifisio i un restorant i yamé Campo Alegre kual a keda situá na Seru Fortuna. E kompleho a habri su portanan riba 30 di Mei 1949 i for di e apertura e resòrt a solushoná diferente problema ku tabata surgi durante prostitushon klandestino den Punda, Otrobanda i barionan den bisindario.

Segun algun rapòrtnan, Campo Alegre tabata bon bishitá tantu dor di lokal komo turistanan. Segun e informashon, e resòrt tabata risibí kasi 600 bishitante pa dia.