WILLEMSTAD, — Entre 2013 i 2015 a hasi investigashon sientífiko pa asina por investigá  riesgo di e infekshon seksual di Human papillomavirus (HPV) aki na Kòrsou bou di e sekso femenino.  

Na aña 2013 pa 2015 a hasi tèst aki na Kòrsou di HPV bou di trahadónan seksual i personanan femenino ku no ta trahadó seksual. A hasi esaki pa asina por haña mas perspektiva den e prevelensha di diferente tiponan di HPV i tambe faktornan di riesgo relatá na esaki. A entrevistá i investigá datos ku a keda butá disponibel dor di Campo Alegre. E investigashon sientífiko a keda ehekutá dor di un grupo di sientífiko ku ta laborá entre otro na Universidat di Amsterdam.

HPV ta un infekshon seksual ku ta konsistí di grupo di vírus ku por infektá e área genital i otro parti di kurpa. Tin hopi diferente tipo di HPV, i miéntras algun ta relativamente inofensivo, tin formanan di HPV ku por kousa frèt na kueru. Otro forma di HPV ta HPV di haltu riesgo (hrHPV). Esaki ta pasobra nan ta asosiá ku un riesgo oumentá di algun tipo di kanser, inkluyendo kanser di sèrvis uterino (baarmoederhalskanker).

A hasi tèst na entre otro 76 trahadó seksual i 228 personanan femenino ku no tabata trahadó seksual pero ku si tabata den e mesun kategoria di edat. A resultá ku prevelensha di HPV bou di  trahadónan seksual tabata 25.0%, i bou di personanan femenino ku no tabata trahadó seksual tabata 29.4%.  E prevelensha estadístikamente di HPV ta signifikante  bou di trahadónan seksual for di Repúblika Dominikana (42.1%) i trahadó seksual for di Colombia (19.2%). 

Edat hóben tabata e úniko faktor di riesgo relashoná ku prevelensha di HPV entre trahadónan seksual entre 29.2 aña i 37 aña. E prevelensha di HPV bou di e kategoria di edat di personanan femenino ku no tabata traha trabou seksual, tabata  entre 33 pa 39 aña. Un kantidat signifikamente mas haltu di personanan femenino, ku un historia di kualke tipo di transmishon seksual,  a wòrdu reportá bou di personanan ku no ta traha trabounan seksual.  

Pa konklui: No a opservá un diferensha signifikante den prevelensha di HPV bou di trahadónan seksual aki na Kòrsou i personanan femenino ku no ta traha trabou seksual.  A asosiá prevelensha di HPV bou di trahadónan seksual ku un edat mas chikí. Durante entrevistanan ku a keda hasí, a paresé ku trahadónan seksual tabata  mas konsiente tokante strategia di prevenshon, i tabata reportá ménos historia di transmishon di malesanan seksual,  i tabata mas aktualisá tokante eksamen di kanser di sèrvis uterino, en komparashon ku personanan femenino ku no ta trahadó seksual.

Foto: Campo Alegre file foto    No a opservá un diferensha signifikante den prevelensia di HPV na Kòrsou bou di trahadónan seksual i personanan femenino ku no ta traha trabou seksual.