Ta suministrá e bakuna na edat di 9-10 aña, promé ku e persona por keda eksponé na HPV, esaki debí ku investigashon a demostrá ku tin mihó inmunidat si haña e bakuna promé ku adolesensia.

Willemstad, — Na aña 2023 a kontinuá ku e bakunashon di muchanan entre 9 i 10 aña. Na 2023 lo sigui ku e bakunashon di e muchanan ku a nase na aña 2014 pa asina protehá kontra di e Virus di Papiloma Humano(HPV). E bakuna aki lo keda inkorporá den e trayekto regular di bakunashon pa mucha.

E vírus Human papillomavirus(HPV) ta un vírus ku ta plama via relashonnan íntimo. Den Karibe Hulandes, ku ta inkluí, Bonaire, St. Eustatius i Saba (BES) e bakuna di HPV a keda inkorporá den e Programa Nashonal di Bakunashon for di 2013. Un di e bakuna a keda introdusí e islanan St. Eustatius i Saba na 2013, i otro bakuna a keda introdusí na tur tres isla na 2015 (dos dosis pa muchanan muhé di edat 9/10 aña), ku un kubrimentu na 2018 variando entre 28 i 67% riba diferente islanan.

Na paisnan den Karibe, skrining pa kanser di serviks, ta registrá un insidensia i mortalidat mas haltu ku e promedio mundial, ku respektivamente 15.2 i 8.5 pa kada 100,000 persona, miéntras ku, por ehèmpel, na Europa Oksidental e promedio aki ta mas abou, ku respektivamente 6.8 i 2.1 pa kada 100,000 persona. Den e “Rapport di Gezondheidsraad” di Hulanda “Het Rijksvaccinatieprogramma in Caribisch Nederland” di 16 di ougùstùs 2012 ta bisa ku, “un komparashon di e programanan ta mustra ku e bakunashonnan kontra pneumokokken, meningokokken C en i virus di papiloma humano (HPV) ainda ta falta na Karibe Hulandes”.

Desde aña 2015 Rijksinstituut voor Volksgezondheid en Milieu (RIVM) di Hulanda ta kuida di distribushon di bakuna na islanan BES. Na sèptèmber 2015 nan a introdusí bakuna di HPV ku Cervarix pa muchanan muhé di edat di 9 aña. Tambe a organisá un kampaña pa e muchanan ku a nanse den un periodo spesífiko, ku no a risibí e bakuna ainda.

Pa ku Kòrsou, den e aña eskolar 2022/2023, departamentu di salú hubenil a kuminsá ku bakunashon di muchanan nasé na aña 2013. Esaki lo ta pa tantu mucha muhé komo mucha hòmber entre 9 i 10 aña. Na 2023 lo sigui ku e muchanan ku a nase aña 2014. E bakuna aki lo keda inkorporá den e trayekto regular di bakunashon pa mucha. Ta suministrá e bakuna na edat di 9-10 aña, promé ku e persona por keda eksponé na HPV, esaki debí ku investigashon a demostrá ku tin mihó inmunidat si haña e bakuna promé ku adolesensia.

Èks minister di GMN, sra. Dorothy Pietersz-Janga,  ta debidamente na altura ku for di aña 2010 World Health Organization ta propagandá den nan strategia mundial pa eliminá HPV, por medio di bakunashon komo prevenshon primario pa asina por evitá kanser na boka di matris, vagina, vulva, penis, boka i garganta. E èks minister a indiká den pasado ku lamentablemente pa motibunan finansiero Kòrsou no por a start ku e bakunashon mas trempan.

E grupo di enfoke pa e bakuna kontra HPV lo ta muchanan te na e edat di 18 aña. Pa personanan entre 18 i 25 aña ta trahando riba esaki tambe pa wak kon i na unda lo ubiká e parti di bakunashon pa esnan mayor di edat. Departamentu Salú Hubenil ta hasi uso di e personal ku ta trahando aktualmente na e departamentu pa por pasa e bakunanan. Na e momentunan aki, tin bakunan di HPV disponibel pa mucha den hopi parti di mundu. Bakuna di HPV ta ofresé protekshon kontra Vírus di Papiloma Humano (HPV), ku por kousa kanser entre otro kanser na boka di matris, vagina, vulva, penis, boka i garganta..