A ordená kaptura di e hòmber, despues di e insidentenan registrá den luna di dezèmber tras di lomba.

BOGOTA – Ku un òrdu di kaptura, ku ya a keda duná, den poko tempu lo sa di realisá kaptura di Sabel José Beleño Muñoz. Ta trata aki di un hòmber señalá di a venená su dos yunan di kriansa di apénas 5 i 7 aña, provokando morto di un.

Lamentablemente e víktima di 7 aña a pèrdè su bida i esun di 5 aña di edat, a logra sobrebibí despues di risibí atenshon médiko.

E echonan aki a sosodé den luna di dezèmber tras di lomba na Soledad, Atlantico, i segun a bira konosí, e hòmber lo a pone un elemento tóksiko den koi bebe i ofresé esaki na e menornan di edat.

Inkluso, a bira konosí ku e hòmber, di 32 aña, a pone e menornan di edat víktima kompetí pa bebe e ko’i bebe, indikando ku e lo paga sèn na esun ku kaba di bebe promé.

Pa e motibunan aki a ordená kaptura pa e delitunan di homisidio grave i intento di homisidio kontra e hòmber.

Na e momentu ku e echonan a keda registrá, e mama di e víktimanan no tabata tei, pues a bai hasi algun kompra, pa kua e hòmber a probechá su ousensia pa venená e menornan di edat.