A tene diferente reunion den sala di Parlamento na yanüari
February 26, 2024 • 2 minüt pa lesa
WILLEMSTAD, — Parlamento di Kòrsou a duna resúmen tokante di reunionnan ku a keda tené den luna di yanüari 2024.
Na komienso di yanüari parlamentarionan a tene diferente reunion entre otro huntu ku minister Ruisandro Cijntje riba oumento astronómiko di kombustibel. Tambe a tene reunion den komishon sentral riba konsepto di lei “Landsverordening op de kansspelen” (LOK). Huntu ku Fundashon Maneho pa Adikshon (FMA) a deliberá riba uzo di ‘lachgas’ i ‘vape’ bou di partikularmente hóbennan. Medio yanüari a tene reunion di Komishon di asuntunan di Reino, i relashonnan Interparlamentario i di Eksterior enkanto (IPKO) e plan di kontakto ‘contactplan Aruba Curaçao Sint-Maarten Sürnam’.
Tambe parlamentarionan a reuní pa deliberá riba Enkuesta HNO i teknikanan di interogashon pa e investigashon den finansiamentu di e hospital nobo, kual Komishon HNO pronto lo anunsiá e dia pa e kòmbersashonnan públiko por start. Parlamento a trata tambe e situashon di Sentro di Bario Otrobanda (SBO) den Komishon Desaroyo Sosial, Trabou i Bienestar ku direktiva di SBO. Komishon di Asuntunan Doméstiko a deliberá tokante asuntunan na òrdu den yanüari. Na fin di yanüari parlamento a tene reunion huntu ku minister Silvania, promé minister Pisas, i tambe minister Cooper tokante e presupuesto 2024.
Den reunion públiko na fin di yanüari a deliberá huntu ku minister Ruisandro Cijntje, minister Ornelio Martina, minister Larmonie-Cecilia, promé minister Pisas, i minister Cooper tokante presupuesto 2024. Den Komishon Sentral abogadonan a bin splika tokante e “Landsverordening houdende vaststelling van een nieuw Wetboek van Strafvordering”. Finalmente a deliberá tambe huntu ku minister Sithree van Heydoorn, minister Larmonie-Cecilia, minister Ornelio Martina, i minister Cijntje tokante presupuesto 2024.
Ku minister presidènt i alabes Minister di Asuntunan General, Gilmar Pisas, a deliberá riba e proseso ku a keda hibá enkanto C.P.R komo ‘preferred bidder’ i negosiashonnan di R.D.K. i C.P.R. Huntu ku TrustUnie Curaçao i tambe Javier Silvania a deliberá riba ordenansa nobo LOK.
