Abogado Blonk ku palabranan fuerte den korte di apelashon.

Nieuwe Haven,– Den e kaso penal kontra di e hóben Dishane Nelson, abogado Blonk a splika kuantu problema di violensha relashonal tin aki riba nos baranka.

E abogado a splika ku tur relashon ta kuminsá ku flor, regalo, amor i apresio. Pero den kasonan di violensha relashonal, por nota kon un pareha violente tiki tiki ta kuminsá buta mas preshon riba e pareha víktima. Segun e abogado, tiki tiki e flornan a stòp, e regalonan ta bira ménos i e apresio di tur dia ta transformá den palabranan mahos. Dado momentu den e relashon diskushon nan ta kuminsá kaminda dado momentu, e pareha agresor ta tira un wanta kaminda ámbos persona lo keda di shòk.

Mesora e pareha agresor ta pidi diskulpa i pidi pordon. Pero den realidat, algun tempu despues e situashon ta keda similar. E pareha agresor ta sigui usa palabranan mahos i dado momentu e violensha ta kuminsá bira kos di tur dia.

Kòrsou, meskos ku tur otro parti di mundu, tambe tin problemanan di parehanan kaminda relashon nan ya ta den un situashon di violensha. E abogado a splika den su defensa pa Dishane Nelson, ku e relashon entre e mama dje akusado i e pareha, Duwayne Douglas, tabata meskos ku e splikashon ariba menshoná. E relashon a kuminsá bon, pero ta na momentu ku Dishane no tabata den serkania mas, e aktonan di violensha a kuminsá tuma lugá. E hóben riba diferente okashon a wak su mama ku slanan blou riba kurpa i na momentu ku Dishane konfrontá Douglas, kada bes e hòmber ta pidi diskulpa i indiká ku esaki lo no sosodé mas.

Riba 8 di mei 2022 e situashon a sali kompletamente for di man na momentu ku Dishane i Douglas a bringa komo ku Douglas a leshoná e mama basta severo. Dado momentu, Dishane a lòs 6 bala den direkshon di Douglas i komo tres bala a perforá e víktima agresor, e víktima a bin pèrdè su bida.

Abogado Alicia Blonk a splika tambe ku pa un rason òf otro KPC tin un historia pa ninga denunsianan di violensha relashonal. “Mi tin tres kliente aworaki kende ta víktima di violensha relashonal, pero kada bes KPC ta ninga di tuma denunsia kontra di e agresor”. Danki dios un di mi klientenan tin untiki forsa finansiero, ku e por a paga buelo pa eksterior pa asina skapa for di e relashon, pero esei no ta un solushon hustu, e abogado a splika bon kla den sala di korte.

Kasonan similar di violensha relashonal ku resultado fatal.

Tambe e abogado a referí na otro kasonan di violensha relashonal den pasado ku a finalisá mortal pa e sea e víktima òf e agresor. E abogado a duna ehèmpelnan di Clifton O., kende ta un hòmber ku a risibí kastigu di 15 aña despues di a asesiná su pareha, Niurca P, ku tabata traha den un snèk na Montaña. E mama di tres yu tabata serando su snèk despues ku Clifton O a yega na e sitio i kuminsá bringa ku e dama. Dado momentu bala a lòs na e sitio kual tabata fatal pa e víktima. Clifton O. semper a mantené su inosensia indikando ku Niurca a saka arma promé, pero korte no a kere e deklarashon di e kondenado.

Violensha relashonal ta difísil debí ku víktima tin bèrgwensa

Segun sifranan di polis riba krímennan di impakto, tabatin por lo ménos 60 kaso of mas di kasonan unda tabatin violensha relashonal entre novèmber 2022 pa mart 2023. Polis ta tumando nota ku diferente kaso di violensia relashonal ta wòrdu di mèldu na polis dor di personanan ku ta tuma nota di e violensia pero no dor di e víktima mes. Sa sosodé ku asta ora ku polis bai duna asistensia na e pareha òf famia riba indikashon di tersera ku a mèldu, e víktima ta ninga ku el a keda agredí.

Durante un feria na WTC diferente organisashon den e kadena hudisial a splika nan punto di bista enkuanto violensha relashonal. E bosero di KPC, Maurits Rosalina, a splika entre otro ku tin un siklo di bèrgwensa i esaki ta un barera ku e víktima mester pasa aden promé ku e konta un hende straño e situashon. Pues e tema aki ta hopi ferfelu, bosero di polis ta bisa.