WILLEMSTAD,—-Na e momentu nan aki tin un kantante ku sin duda tin farándula lokal dominá,ta e kantante ku ta forma parti di agrupashon musikal “ONE FLAVAZ”.

Ta trata aki di e kantante Adjatay ku por sierto a habri aña bira rei di tumba i algun siman despues ta bira Kantadó Mayó tambe. E dos titulo nan aki pero tambe e bon presentashon nan di e último dos luna nan aki ta pone ku e popularidat di e kantante Adjatay a krese i pone su mes stabil para komo e kantante di mas popular na e momentu nan aki den farándula lokal.

Mas aleu mester bisa ku mardugá di djasabra tras di lomba durante di e selebrashon di 42 aña agrupashon musikal ERA e kantante menshoná esta Adjataya a presentá komo artista kantante invitá den e selebrashon 42 aña ERA,kaminda ku Adjatay a kanta su tumba ganadó i e la keda kompaña pa músiko nan di ERA.

Mester bisa ku Adjatay a bòltu WTC ku e tumba ganadó i e komentario nan rondó di Adjatay tabata grandi i positivo. Pero tambe mester bisa ku djasabra tras di lomba Adjatay a presentá ku agrupashon musikal “ONE FLAVAZ”riba Plaza Wilson “Papa”Godett i Vigilante Farándula tabata presente na e sitio menshoná i mester bisa ku kada un piesa ku e kantante menshoná a kanta e públiko presente tabata kanta kuné, i esaki tabata hopi notabel pa tur hende ku tabata presente na e sitio menshoná i no papia mes na momentu ku Adjatay a kanta e tumba ganadó. Mester bisa ku mes un kos ku den WTC Adjatay a pone tur hende ‘holé djaki i holé djaya.