E agente aparentemente tabata manera un ihá pa e víktimanan.
SAN JUAN – E agente José Miguel Centeno Sanchez, ku ta figurá komo sospechoso di asesinato di un pareha ansiano na Puerto Rico, a pone fin na su propio bida ora ku outoridatnan polisial a bai registrá su bibienda.
Un bosero polisial, a splika ku Centeno Sanchez a kita su bida despues ku a anunsiá di presensia di outoridatnan na su bibienda.
Den transkurso di e investigashon, outoridatnan a deskartá posibel sospechoso nan te na momentu ku a bai konsentrá riba e agente, kende tabata traha na San Antonio, na Aguadia.
E wes Orlando Aviles ta kende a outorisá un òrdu di registro i entrada hudisial na bibienda di e agente, pa asina por logra haña i suma evidensia ku ta konektá Centeno Sanchez na e krímen.
E víktimanan di 83 i 77 aña, a keda mord’é i tirá dia 11 di òktober último na nan bibienda, ubiká na e bario Arenales di Isabela.
Centeno Sanchez a realisá labornan di reparashon di bibienda di e pareha di ansiano, pues e tabata manera un ihá di esaki nan.
E shèf polisial a kalifiká e kaso di asesinato aki komo unu fuerte i a sigurá ku e agente sospechoso nunka no tabata un agente polisial di bèrdat i no ta representá e kuerpo polisial.