AMSTERDAM—Pa fin di mart tabatin 437.000 vakatura habrí na Hulanda, kasi mes tantu ku na final di 2022.

Hopi kompania na Hulanda ta den nesesidat di personal, pasobra e skarsedat ta keda enorme riba merkado laboral. Prinsipalmente den komersio i kuido mester di hopi personal. Mayoria vakatura habrí ta den komersio (85.000), servisio empresarial (71.000) i kuido médiko (67.000). Huntu e tres sektornan aki ta representa mitar di tur vakatura habrí. E skarsedat riba merkado laboral ta grandi segun ekonomista di CBS. En general mester di hopi hende. E merkado no ta kambia. Den kuido mediko a bini 3.000 vakatura ekstra, ku a totalisá 67.000 na final di segundo kuartal. Den kultura, rekreashon i otro servisio e kantidat a oumentá na 14.000. den komersio tin 85.000 vakatura habrí. Desempleo a baha leve den prome kuartal di aña ku 2.000, pa un total di 357.000, meskos ku kuartal previo ta 3,6% di poblashon aktivo. Ta trata di personanan ku no tin trabou pero si a buska resientemente i ta disponibel riba termino korto.