WILLEMSTAD ——- Fin di aña sin zanzaña Den kuadro di e akshon ‘Fin di aña sin zanzaña’, Kuerpo Polisial ke alertá prinsipalmente shofùrnan di vehíkulo ku durante fin di aña aki ta bai kontrolá ku mas regularidat riba e konsumo di alkohòl durante ku ta manehá un vehíkulo, òf manehá un vehíkulo bou di influensia di alkohòl.

Ta konosí ku den fin di aña, sigur durante dianan di fiesta e konsumo di alkohòl ta oumentá i esei tin su rísikonan pa esnan ku ta manehá vehíkulo bou di influensia riba kamindanan públiko, pero tambe pa otro usuarionan di kaya. Na aña 2022 tabatin 35 aksidente di tráfiko kaminda e shofùr di vehíkulo tabata bou di influensia di alkohòl i ku a keda detené. Pa loke ta trata e aña koriente, ya e kantidat ta na 52 i ainda tin algun siman mas pa bai promé ku nos yega final di aña 2023. P’esei un bia mas ta bai e súplika na esnan ku ta manehá un vehíkulo i ku tin intenshon di konsumí alkohòl, pa sali ku un BOB, esta un persona responsabel i ku ta keda sobrio, pa e por manehá pa bo. Di e manera ei nos ta evitá situashonnan di lamentá.