Grandi: Kirby ta ópera un fleta di 250 toubot huntu kombiná ku mas di 1.000 lancha riba laman i riuwnan na Estádos Unídos.

Schottegat–  E akshonnan di Kirby Corporation, kual parti di e bolsa na Ennia a sirbi pa kompra, tabatin un bon dia miéntras ekspertonan den invershon ta siguiendo su desaroyo. Kirby Corporation ta unu di e kompanianan ku Hushang Ansary a kumpra despues di a saka i transformá su akshonnan den e konsorsio di Ennia pa kompanianan estado unidense.

Manera publiká ayera den Vigilante, e gigante petrolero Chevron a risibi lisensia temporal pa kuminsá eksportá produktonan petrolero for di Venezuela. Segun e agensia di notisia Reuters, e kargamentunan di krudo lo keda rafiná na kosta Sùit di Estádos Unídos. Pa Kòrsou, esaki ta un bon notisia pasobra ta amplia e posibilidatnan pa kisas almasena produkto na Bullenbaai. Pa Ennia Caribe, Banko Sentral i grupo Ansary, e desaroyo nobo i posibilidat pa eksportá krudo for di Venezuela ta afektá balor Kirby Corporation.

Tin un desaroyo bastante interesante ku ta tumando lugá na Kòrsou ku por resultá den efektonan riba balor den akshonnan di Ansary na Estádos Unídos. Na momentu ku Chevron ehekutá nan lisensia pa eksportá krudo for di Venezuela, Estádos Unídos mester transportá e derivadonan prosesá nan na refinerianan. Esaki mester sosodé pa gran parti via di nan riwnan. Na momento e derivadonan yega na kosta di Estádos Unídos, mester di lancha pa subi e kanalnan i riwnan pa transportá. Hushang Ansary tin entre 8 pa 10% akshon den e kompania di transpòrt petrolero interno mas grandi di Estádos Unídos, Kirby Corporation.

I wowonan invershonista, mesora ta kai riba Kirby. Den apénas 3 dia ku Chevrona hasi nan anunsio, e balor di Kirby Corporation a subi ku 2.6 dòler estado unidense riba kada akshon. E subida, ta unu remarkabel si mira e reakshon dje balor riba e anunsio di Chevron. Pero e balor di Kirby, promé di e anunsio tabata luchando.  E akshonnan di Hushang Ansary den Kirby Corporation a stabilisá na 72 dòler despues di un kaida fuerte durante Covid na mart 2020. Na medio 2017, den un akuerdo di kompra i benta, Hushang Ansary a transformá su akshonnan den Stewart & Stevenson den Kirby Corporation. E transakshonnan a tuma lugá algun luna promé ku Korte a imponé un Medida di Emergensha riba kuentanan di 5 kompania na Ennia Caribe Holding.. Parman International, ku Hushang Ansary komo e akshonista prinsipal, a laga transformá un suma di 282 mion dòler fo’i grupo Ennia Caribe, den forma di invershon den Kirby Corporation, un kompania ikono den transporte industrial marítimo na Houston Texas, Estádos Unídos.  Kirby Corporation ta kapitalisá na un balor di balor di 4 bion dòler estado unidense miéntras nan preis di akshon despues di Covid na mart 2020 a bin kai bendiendo na 48 dòler miéntras na yanüari 2020 su balor tabata na 90 dòler pa akshon. Te ku ayera, e balor tabata anotá na kasi 70 doler bek dòler estado unidense.

E kompania ta bendiendo 1.7 bion dòler anual. Kirby ta e kompania di transporte marítimo di lancha,  mas grandi na Estádos Unídos. Kirby ta ópera un fleta di 250 toubot huntu kombiná ku mas di 1.000 lancha riba laman i riwnan na Estádos Unídos. Nan transporte marítimo ta konektá e popular riu di Mississippi ku restu di Estádos Unídos miéntras riba e Intercoastal for di e Golfo di Mexico ku ta konektá na Estado Unídos, Kirby ta e medio di transporte mas dominante pa,lokual ta trata tráfiko petrolero. Aparte di ta un lider riba riu di Mississippi, nan ta duna servisio industrial dor di bende ekipo i makinaria manera generator, motor, instalashon di energia nuklear industrial.

Wikènt tras di lomba e kompania Estado Unidense, Chevron, a risibi un lisensia ofisial pa kuminsá eksportá krudo for di Venezuela. Ku e desishon, Chevron ta risibi e posibilidat di rekuperá biónes di debe ku PDVSA debe e kompania.

Pa Refineria Isla, e notisia por bira un apertura pa prosesá krudo na Kòrsou. E lisensia di Chevron ta permití e kompania estado unidense pa importá ekipo di sosten pa asistí PDVSA na eksportá demas derivadonan tambe. Demas kompanianan manera Baker Hughes, Hailliburton, Schlumberger i Weatherford tambe a laga renobá nan lisensia pero no por a ekspandé esakinan, lagando atras un posibilidat limitá di eksportá krudo venezolano.

Pa Kòrsou, e anunsio di Chevron por ta un bon notisia. Tantu pa e posibilidat di prosesá krudo na Isla, komo pa Bullenbaai ku ta funshonando bou di un struktura entre diferente kompania pa por almasena fuel oil di Venezuela.