Jeep den kual tabatin dos persona ku a sufri leshon.

Willemstad—- No ménos ku seis víktima a keda transportá  pa CMC despues ku nan tabata envolví den un aksidente frontal na altura di Krakeel.

Djamars 10 di òktober 2023 alrededor di 22.45’or, Sentral di Polis a dirigí unidatnan di Barber pa e krusada Weg naar Westpunt i Kaminda Monica Kapel-Matheeuw pa un aksidente bastante grave. Na yegada di e promé unidat,  a konstatá un aksidente entre un outo di famia i un jeep. Den e jeep tabatin dos persona i den e outo di famia 4 okupante. For di investigashon preliminar a sali na kla ku e jeep tabata koriendo riba Weg naar Westpunt den direkshon di Barber miéntras ku e outo di famia ku tabata koriendo riba Kaminda Monica Kapel-Matheeuw den direkshon di Weg naar Westpunt, a subi e kaya último aki i dal kontra di e jeep. Shofùr di e jeep i e okupante a sufri leshon na entre otro skouder i kabes. E 4 okupantenan di e outo di famia a sufri heridanan di mas gravedat, miéntras ku e shofùr a keda pegá den su vehíkulo. Ku yudansa di e vehíkulo di reskate, a logra di saka e shofùr for di su situashon. Tres ambulans ku a yega na e sitio a transportá tur e 6 víktimanan pa Sala di Emergensia di C.M.C. pa tratamentu médiko. Personal di Departamentu di Tráfiko ta kontinuá ku e investigashon.