Back to Top
Responsive image
E korant di pueblo

Aksidentenan di tráfiko tin ora ta tuma lugá innesesariamente


May 21, 2021 • 2 minüt pa lesa

Willemstad-Pa loke ta e hopi aksidentenan di tráfiko ku ta tuma lugá diariamente, por bisa hopi di nan por keda evitá.

Aksidentenan ta tuma lugá tin momentu ku asta no tin daño material visibel na e vehíkulonan. Hopi biaha e kousa di aksidentenan ta pa motibu di falta di preferensha ku tambe por keda evitá. Loke ku sigur ta hala atenshon ta aksidentenan ku ta tuma lugá debí ku un di e shofùrnan tabata hasi uso di nan telefon, pues ku e atenshon na tráfiko no tabata tei. Hopi aksidente por keda evitá, esaki ta keda na kada shofùr kuantu e ta stima su vehíkulo i si e ke keda na pia. Tin di nan tambe ku tin ora no por keda evitá esaki debí na velosidat haltu òf no tabata por otro. Tur dia di nobo ta keda registrá sigur mas di 10 aksidente rònt Kòrsou. Tin ku hendenan envolví ta keda herida leve òf grave, tin ku ta rekerí mas atenshon ku otro. Un kos ta sigur hopi ta kere ku ta nan so ta den tráfiko i no ta tene kuenta ku otro. Tambe hopi ta esnan ku no ta respetá bòrchinan òf lusnan di tráfiko, tur esakinan ta motibunan pa aksidentenan keda okashoná. Pa loke ta un opservashon e lastu tempunan ora ku tin toke di keda tin basta aksidente ta tuma lugá i asta a keda registrá ku resultado fatal. Tin outomobilista ta pensa mas duru e kore pa e por yega kas mas mihó. Si e orario di toke di keda a yega i bo tin un par di minüt lat riba kaya no mester trata na mata bo kurpa pa bo yega bo destinashon. Mihó lat ku bo keda sin yega, kore responsabel i evitá di hinka abo i otronan su bida den peliger. Un tiki mas atenshon na nos tráfiko ta evitá hopi aksidentenan di tuma lugá.

Login