Aktivistanan ta pensa ku e situashon ta birando pió.

CARACAS – Aktivistanan pa derechi di LGTBI di Venezuela a pidi estado pa atmití nan solisitut di krea un protokòl di investigashon ku por garantisá hustisia pa personanan transgénero víktima di delitunan basá den prehuisio. Esaki despues ku resientemente a revelá ku 93 hende muhé trans a keda asesiná na e pais for di aña 2008.

Rodriguez a splika ku e idea di e Opservatorio Venezolano di Violensia LGTBIQ+, ku ta liderá e inisiativa, ta inkluí nan mes den e investigashonnan ofisial, komponente ku por pèrmití kalifiká esaki nan komo krímennan di odio na personanan trans asesiná.

Pa esaki, resientemente a solisitá na Defensoria di Pueblo i na Fiskalia pa establesé “mesanan tékniko” pa asina traha huntu den protokòl ku por garantisá abordahe multifaktoral di e echonan i tambe esaki nan su prevenshon. Ta trata aki di un propuesta ku ainda ta warda un kontesta.

Rodriguez, tambe abogado i kofundador di e opservatorio, a splika ku e investigashonnan pa krímen di odio òf di violensia di género no ta eksistí na Venezuela, pa kua a pidi pa buska pa garantisá ku e agreshonnan pa e motibunan aki por keda kastigá i e víktima por keda “kompañá i respaldá”.

Ademas a indiká ku e protokòl aki ta permití pa rekonosé i kastigá esun nan ku kometé echonan ku drenta den kalifikashon di diskursonan basá den prehuisio òf insidentenan basá den prehuisio. Ta trata aki di un kategoria ku ta hasi referensia na situashonnan ku no ta pasa den un konteksto mayor, pero ta afektá e víktima.

E defensornan di derechinan humano a aklará ku ta responsabilidat di e sistema di hustisia pa tipifimá delitunan manera krímen di odio, pero ta konsiderá ku promové investigashonnan ku ta konsiderá e konteksto sosial di e víktimanan, lo ta un paso sumamente importante.

E opservatorio a rekòrdá ku mas di 150 persona LGBTI a sufri violensia òf deskriminashon pa identidat di género i orientashon seksual durante e promé periodo di 2023 i ta nesesario e kompañamentu institushonal pa demostrá boluntat den kambia e realidat aki.

Den e kaso di personanan trans, e situashon ta pió, pues den e aña aki, e organisashon a dokumentá 40 kaso di agreshon i 3 di asesinato.