Minster Sithree van Heydoorn di ministerio OWCS ta firma akuerdo akuerdo huntu ku minster Shalten Hato di ministerio di Hustisia

Willemstad, — Dia 27 di òktober último na Acoya Resort a tuma lugá un konferensha di prensa den oranan di mèrdia  di Ministerio di Enseñansa, Siensia, Kultura i Deporte, i ministerio di Hustisia den kual a bini huntu pa asina firma dos akuerdo.

Minister Sithree van Heydoorn, a menshoná ku huntu ku ministerio di Hustisia lo firma un akuerdo di protokòl di koperashon. Minister a menshoná ku e tarea no ta pa solamente duna edukashon, pero tambe pa wak kon leu por yuda hustisia pa prevení kriminalidat. Tambe lo yuda e klientenan ku ta den SDKK pa asina nan por bin bèk den komunidat na un nivel mas haltu ku nan a drenta kuné den e sentro di detenshon. Minister van Heydoorn a menshoná ku Dienst Openbare Scholen (DOS), supsidiario di OSBOD, lo bai duna kurso na 192 kliente di SDKK.

E klientenan aki ta bai risibí edukashon na nivel 1 SBO, pero tambe lo bai duna diferente otro kursonan na e sentro di detenshon. Minister van Heydoorn a menshoná ku e edukashon mester kontribuí na transformashon di personanan ku a faya den bida pa nan por ta un mihó ser humano. Tambe e minister di edukashon a menshoná ku edukashon mester kontribuí pa e personanan aki por drenta bèk den sosiedat ku un papel den nan man i asina haña un trabou i/òf tambe sigui un estudio ku un base sólido. Minister van Heydoorn a menshoná, ku e stap aki, e ke ta un kontribuidó pa asina yuda e klientenan di SDKK, pa mañan nan por tin un mihó porvenir.

Minister  di Hustisia Shalten Hato, ku tambe a duna palabra, a menshoná ku porfin ta bai firma dos protokòl ku ta sumamente importante pa e ministerio. Minister Hato a menshoná ku ta bai akordá ku otro pa traha aun mas estrecho pa prevení kriminalidat, pero tambe pa resosialisá klientenan di SDKK. Minister Hato a menshoná ku tambe lo bai uza deporte pa prevení kriminalidat. Esaki tambe ta bai ta parti di e akuerdo ku e dos ministerionan ta bai firma huntu.

Lo sigui traha ku otro pa asina yega na proyektonan konkreto, e minister di hustisia a sigui splika den un sala yená ku prensa. Minister Hato a agregá ku den plan di gobernashon di gabinete Pisas ll, a menshoná ku pa prevení kriminalidat mester hasié konhunto ku ministerio SOAW, pero tambe ministerio di OWCS. Minister Hato a menshoná ku porfin enseñansa a drenta SDKK pa asina personanan ku no por a logra haña enseñansa pafó por haña esaki.