Akusado Franzl Harts kende a risibí sentensia di 13 aña, pero a opta pa apelá.

NIEUWE HAVEN,– E hòmber Franzl Harts a opta pa hasi uso di su derechi pa keda ketu dilanti tribunal di apelashon. Aunke Harts tabata e persona ku a apelá su sentensia, Harts a opta pa no bisa nèt nèt nada den sala di korte.

Franzl Harts(1998) a keda kondená pa un kastigu di 13 aña, despues ku korte a haña sufisiente prueba ku Franzl lo a kometé asesinato di e hòmber Ramon E. Melendez Requeña. Durante tratamentu den promé instante, e fiskal mr Oppe a hasi un demanda di 14 aña, pero korte a opta pa desviá for di e kondena i kita 1 aña fo’i dje demanda. Korte a dikta na sèptèmber 2022 ku Franzl Harts mester sinta un kastigu di 13 aña pa asesinato di e víktima riba 12 di òktober 2021.

Tribunal di apelashon a pasa den echonan di e kaso, pero Franzl Harts no a duna splikashon tokante e echonan. Segun Franzl Harts, hopi hende a kuestioná riba e echo di apelá, pero mi ke para riba mi inosensia.

Hues mr Carmelia a indiká ku e derechi pa keda ketu ta algu importante i ta un derechi, pues no por obligá Harts pa duna deklarashon durante tratamentu den korte di apelashon. Tambe hues Carmelia a splika ku no ta usual ku un persona ta apelá un sentensia den promé instante i despues ta opta pa keda ketu den korte di apelashon. “Por sierto tin un abogado pa hiba bo defensa, pues ta algu di respetá”, Carmelia a splika.

Durante investigashon penal, Harts lo tabata kambia su deklarashon nan riba diferente okashon. Tabata den Harts su di 12 interogashon ku a tuma lugá riba 10 di novèmber 2021, ku Harts ta bin ku un otro deklarashon kaminda e ta aseptá ku e tabata na e sitio di e krímen. Pero despues den Harts su 10 siguiente interogashonnan, e tabata keda kambia deklarashon riba partinan esensial. Loke ta resaltá tabata e echo ku Harts tabata involukrá otro personanan den su deklarashon i tabata instruí otro personanan kiko nan mester bisa.

Deklarashon nan hasí di Harts ta inkluí ku e tabata debe Ramon alrededor di 8 pa 12 mil florin. E no tabata por a paga Ramon bèk i pa e motibu ei, el a drenta un dil ku Ramon ku e ta pag’é ku outo di su pareha ku yama Jenny. E mainta ei, Ramon lo a bin busk’é pa huntu nan bai kue e outo di Jenny. Pero ora Ramon a yega, Ramon tabatin un gai ku yama Minguel den outo huntu kuné. Ramon lo a bisé ku nan lo mester bai baha e gai aki na Banda bou pa despues bai kue e outo di Jenny te na Montaña. Riba dia di tratamentu den promé instante  fiskal a konstatá ku e no ta kere e deklarashon aki di Harts mirando ku no ta lógiko ku Harts ta kompaña Ramon pa bai te banda bou pa despues bai bèk Montaña pa buska outo dje frei.