NIEUWE HAVEN,– Na un banda tin abogadonan den korte penal ku ta diskutí ku outoridatnan tin muchu poder pa alargá aresto preventivo di un sospechoso, pero  na otro banda e mesun outoridatnan ta diskutí ku aresto preventivo ta un hèrmènt di sumo importansha pa asina evitá ku  un sospechoso den un kaso penal ta sigui kousa mas daño na komunidat.

E leinan penal ta pendiente renobashon. Aktualmente parlamento ta teniendo diferente reunion i alabes debate tokante e kódigo penal. Na febrüari aña pasá representantenan di Ministerio Públiko por a reuní ku parlamento enkuanto e kódiko penal nobo i na fin di yanüari 2024, abogadonan Paula Janssen i Rutsel Martha, a tene un reunion tékniko ku parlamento.

Aktualmente nos leinan ta dikta ku un sospecho fuerte di a kometé un delito penal kombiná ku pruebanan manera deklarashon di testigunan ta sufisiente rason pa un hues komisario ordená aresto preventivo. Ta asina ku detenshon preventivo ta dura 3 dia, pero abase di investigashon adishonal, esaki por wòrdu alargá pa 8 dia, siguí pa 14 dia adishonal kaminda despues di esaki, hues komisario por ordená 2 biaha 30 dia di alargashon.

Durante tratamentunan penal den korte di hustisia, abogadonan ku ta hiba defensa pa nan klientenan semper sa pidi hues pa skòrs e aresto preventivo. E rason di skòrs e aresto preventivo por varia enorme, pero ta keda na e hues penal pa disidí si e aresto preventivo ta wòrdu di skòrs.

Durante un reunion ku parlamento ku tópiko di renobashon di e kódigo penal, abogado dr Rutsel Martha a krítika e echo ku por alargá aresto preventivo ta algu prekupante. Martha a sigui splika ku aresto preventivo ta un forma di aresto ku por tuma lugá promé ku hues duna un kondena. Den práktika hues komisario por alargá un aresto preventivo riba e punto di bista si e akusado por ta un peliger pa komunidat. Pero Martha a agregá ku mesora bo kue un persona sera, su defensa ta bira mas difísil i e por hañ’é den diferente problema personal. Problemanan personal ta inkluí pèrdida di trabou i e no por yuda su famianan mas.

Apénas tres siman despues di e deklarashon di Martha, korte di hustisia a ordená libertat pa un hòmber ku a keda kondená na 13 aña den korte di promé instante. Ademas segun informashon, e hòmber Robert A., tabata será for di yanüari 2022. Esta Robert A. tabata será pa mas ku 2 aña pendiente tratamentu di su kaso den apelashon. Durante tratamentu di e kaso di Robert A. e hòmber a insistí den su inosensia te na final. Ademas, A. a splika ku sèn generá na Kòrsou e ta manda pa famianan na Haiti. E rason pakiko Robert A. tabata será entre e periodo di e veredikto den promé instante i e veredikto den korte di apelashon tabata debí ku Robert A. a wòrdu kondená pa asesinato di e víktima den promé instante.

Otro sospechoso kende aresto preventivo tambe a afektá su bida personal tabata e hòmber ku insial J.M. Segun deklarashon nan, M. lo a asta pèrdè su trabou di 11 aña despues ku e hòmber a wòrdu sospechá di tabata enbolbí den robo i inkubrimentu di un kantidat di hèrmènt di Brantwer.

Vigilante a drenta den kontakto ku defensa di Robert A. kende a indiká ku nan ta bai entamá un kaso sivil pa daño perwisio.