Momentu di yegada di Saab na e aeropuerto di Caracas.

CARACAS – E empresario kolombiano Alex Saab, kolaboradó estrecho di e presidente di Venezuela, Nicolas Maduro, a aterisá na e aeropuerto internashonal di Maiquetia, na Caracas. Esaki algun ora despues ku e gobièrnu di Estádos Unídos a liber’é despues di 1.286 dia detené na Miami pa labamentu di plaka.

Na e aeropuerto e tabata keda wardá pa su kasá, Camila Fabri, e promé dama, Cicilia Flores, meskos ku tambe su sinku yu nan.

Segun e akusashon nan, entre novèmber di 2011 i sèptèmber di 2015, Saab i su man drechi, Alvaro Pulido, detené na aprel di e aña aki na e pais karibense pa supuesto kaso di korupshon, a konfabulá ku otro individuo pa laba su ganashi nan ilegal i transferí nan for di Venezuela pa kuenta nan bankario na Estádos Unídos. Pa esaki Washington tabatin hurisdikshon den e kaso.

E liberashon aki a keda produsí ora Venezuela tambe a saka serka di 30 persona, konsiderá prezu polítiko, entre nan 10 estadounidense a kambio di Saab. Tur esaki despues di negosiashon nan entre gobièrnu nan di ámbos pais.

Komo parti di e akuerdo, ademas, Venezuela a aksedé na ekstraditá e kontratista militar estadounidense Leonard Francis.

Pa realisá e interkambio aki, segun a keda indiká, Biden mester a tuma un desishon difísil di ofresé algu ku Venezuela tabata en buska di dje, di forma aktivo.