WILLEMSTAD – Tur yu ku no a kumpli 21 aña di edat tin derecho riba alimentashon. Si e yu ta bai skol e tin e derecho di alimentashon te 25 aña. E montante di alimentashon por keda stipulá dor di un desishon di korte (asina yamá “rechterlijke beschikking”) òf segun un akuerdo boluntario na ofisina di Voogdijraad. Esaki ta bira e montante ku tur luna lo mester keda depositá pa mantenshon i kuido di e yu.

Konforme loke ta keda stipulá den artíkulo 402a, promé punto di buki unu di nos Kódigo Sivil, e montante di alimentashon ta keda legalmente oumentá dor di un porsentahe (asina yamá indeksashon) kual ta wòrdu fihá dor di minister di Hustisia.

Den un dekreto ministerial (MB) fechá 13 di desèmber 2023, minister di Hustisia a stipulá e oumento di indeksashon ku 2.70%. Esaki ta nifiká ku e montante ku ta risibí òf ku ta paga pa luna na alimentashon lo oumentá entrante promé di yanüari 2024 ku 2.70%.

Por ehèmpel si pa luna un persona ta paga òf risibí 100 florin na alimentashon, e montante akí lo subi ku 2 florin i 70 sèn entrante promé di yanüari 2024.

Ku e tabèl akí por hasi kalkulashon nobo di kuantu mester bai paga na alimentashon entrante promé di yanüari 2024: Kalkulashon indeksashon Justitiële Zorg (Voogdijraad)