WILLEMSTAD, — Nos kurpa ta traha dopamina na un manera natural, pero konsumo di alkohòl ta aportá na un manera inatural na mas kreashon di dopamina. Esaki ta e motibu prinsipal di kon adikshon por desaroyá.

Dopamina ta un mensahero den e sesunan ku ta permití pa sélulanan di nervio pa komuniká ku otro. E ta importante pa algun funshon di sistema di nervio, manera moveshon, plaser, atenshon, estado di ánimo i motivashon. Durante momentonan di kome, seksualidat i interakshonnan sosial, tin un liberashon di dopamina den e sirkuito di rekompensa di nos kurpa. E sirkuito aki ta hunga un papel importante den kondukta ku ta stimulá sobrebibensia i reprodukshon.

Alkohòl tin e kapasidat pa imitá e proseso di rekompensá natural aki. Alkohòl ta engañá i abusá di e sirkuito natural di rekompensa di nos sistema biológiko. E persona adikto na alkohòl ta eksperensiá un rekompensá innatural asina fuerte ora ta konsumí alkohòl. Oumento den e nivelnan di dopamina ta bai huntu ku sentimentu di deseo i euforia, i ta wòrdu atministrá ya kaba ku un kantidat chikitu di alkohòl. Dor di e efekto stimulante i euforisante aki, e persona ta pensa ku e ta kapas di por hasi tur kos mió, miéntras ku su kapasidat pa rindimentu en práktika ta bai patras.

E imitashon di e sirkuito di rekompensa por medio di alkohòl ta hopi mas grandi ku e siruikto di rekompensa ku nos kurpa mes ta traha pa asina nos por haña dopamina. Ku rekompensa natural di nos kurpa, e efekto di e estímulo di dopamina ta disminuí despues di un tempu. Esaki ta nifiká ku e dopamina ta baha. Pero pa un persona adikto, e uzo repetitivo di alkohòl, ta kondusí na un kresementu gradual di e nivelnan di dopamina. E nesesidat pa konsumí alkohòl pa asina por haña dopamina konstantemente ta keda wòrdu stimulá ku e bebementu di alkohòl. Esaki ta un motibu krusial kon adikshon por desaroyá.

Pa un persona ku ta adikto na alkohòl, e deseo, e anhelo pa alkohòl, tei presente den un tèrmino largu. Tin indikashon ku sierto personanan ta mas suseptibel pa eksperiensha un efekto di rekompensa mas fuerte despues di uzo di alkohòl kompará ku otro personanan. E personanan aki probablemente tambe ta mas suseptibel pa desaroyá adikshon di alkohòl.

Dependensia di alkohòl riba tèrmino largu ta peligroso pasombra e no ta solamente kousa adikshon, pero tambe e ta dañino pa selebro i otro órgano den kurpa manera  hígado i sistema kardiovaskular. Alkohòl por kousa tambe impotensia seksual na hòmbernan. Tambe alkohòl por aportá na problemanan di salú mental manera depreshon, ansiedat, i otro kondishonnan sikológiko. Ademas, e por kousa problemanan den relashonnan sosial i familiar.

Foto    Glas ku alkohòl

Uzo di alkohòl ta hisa nivel di dopamina i ta kousa sentimentu di deseo i euforia. Un persona adikto, ta adikto na e oumento di e sentimentunan aki, entre otro dopamina.