Willemstad,– Despues ku na yüli 2023 gobièrnu di Kòrsou a paga e kompania merikano First Priority Group 1.3 mion, ayera dos di e tres ambulansnan a keda entregá pa uso.

Den siman tras di lomba por a nota ku diferente medio di komunikashon a publiká ku e ambulansnan a yega Kòrsou. Despues ku dos ambulans a sali Duana, mesora e move pa ofisina di kùr pa sòru ku e ambulansnan por kore riba forma legal riba nos kareteranan. Despues ku e dos ambulansku a yega Kòrsou a pasa nan kùr, ministerio di GMN a entregá e ambulansnan riba forma seremonial na Fundashon Kuido di Ambulans.

Despues di a pasa un trayekto di destaho públiko, e kompania merikano First Priority Group a gana e destaho na balor di 1.3 mion florin.  Segun informashon, for di 27 kompania i diler di ambulans a aserká 10 kompania ku e petishon pa ofresé 3 ambulans nobo òf ‘remounted’. Un kantidat di 5 kompania mes tambe a aserká e fundashon pa nan tambe partisipá den e destaho públiko. A instalá un komishon di evaluashon dia 6 di yüli último konsistiendo di 4 trahadó di FKAK, pa evaluá ofertanan entregá. E siguiente dje instalashon dje komishon tabatin 2 oferta entregá. Unu di First Priority Group i e otro di Demers Ambulances.

E trayekto pa yega na ambulans nobo ta un trayekto di alrededor di 2 aña kaba. Parlamento a debatí ampliamente anteriormente tokante skarsedat di ambulans. FKAK tin solamente 6 ambulans ku no ta funshoná optimal i ta konstante den uso. Tambe Parlamento a papia tokante kumpramentu di nobo. Te ku siman pasá e situashon tabata demasiado krítiko na momentu ku Fundashon Kuido di Ambulans mester a emití un komunikado splikando ku e pòst di ambulans na Barber mester a usa un ambulans di Krus Kòrá pa ofresé kuido médiko riba kaya.