WILLEMSTAD— E Hefe di Kuerpo Polisial Kòrsou den e kaso aki alto inspektor Raymond Ellis durante e rueda di prensa a indiká ku e kasonan di asesinato registrá aña pasa ta e sifra di mas abou durante e último 20 aña nan.

Pa loke ta trata di detenshon pa ku e kasonan di asesinato  na aña 2022 esaki tabata 6 sospechoso ku a keda arestá kual ta netamente 50 porshento di e totalidat di e kasonan ku a keda solushoná.  Segun Ellis tin ku bisa si ku na aña 2020 i tambe 2021 e detenshon pa ku kasonan di asesinato tabata mas haltu kompará ku 2022. Mayoria di e arestonan den aña 2022 pa ku asesinato tabata sospechosonan ku tabatin aber ku e kaso i a keda presentá den korte kual ta pone pensa ku esaki por tabatin influensha riba e sobra aña ku a pone ku e kasonan di asesinato a keda te na 8. Tirando un bista bek riba e kasonan di asesinato na aña 2022 por bisa ku di e 8 kasonan di asesinato 7 tabata di e sekso maskulino ku a bin pèrdè su bida miéntras unu tabata di e sekso femenino. Tambe tin ku bisa e arma ku a ser usa pa kometé e krímennan aki tur tabata trata di un arma di kandela. Mirando e uso di arma di kandela esaki sigur ta na atenshon di  Kuerpo Polisial i mesora a buska kontakto ku organisashon manera ATF ku ta abreviashon pa Alkohol Tabaco and Fire arms ku tin basta informashon di unda e armanan ta sali i ta kuminsá kana e kaminda pa wak di unda e armanan aki ta sali i yega nos Pais.  For di investigashon di e kasonan di asesinato por a determiná ku sinku di nan tin aber ku likidashon, 2 tin aber ku kaso di relashonal i unu tabata un disputa esta un problema ku a bin sali for di man.