Segun Ana Maria Pauletta minister Cooper ta kere ku un moshon ta dun’é poder pa hasi lokual e kier, pero tur lei mester pasa parlamento pa haña aprobashon.

Willemstad,– Parlamentario Anna Maria Pauletta a baha basta pisa riba minister Cooper ayera pa loke ta e lei di transporte públiko. Ana Maria a splika ku tempu Cooper tabata den parlamento e mes a firma un moshon ku señor Walroud a traha i awe e kier imponé sin skucha e sektornan enbolbí i ta aktuando di forma arogante pa ku e lei aki.

Ana Maria ta sigui bisa ku señor Cooper a bini parlamento keriendo ku e ta haña lus bèrdè pa arogansia i ku e mester a para Cooper pa splik’é ku un moshon no ta dun’é rèspèt pa atendé ku e punto di transporte aki di forma arogante. Pauletta ta sigui bisa ku Cooper ta papia ku e sektor manera ta e ta manda i ku e no ta akseptá niun otro hende. “Si nos kier drecha transporte públiko nos mester hasi esaki huntu, paso finalmente esnan ku ta kore bus i taksi ta nos hendenan. Pues e moshon ku señor Walroud a traha inkluyendo tur sektor, no ta pèrmití Cooper pa klap hende ku esaki i mi ta kere ku ora Cooper  a bini parlamento e lo a kere e ta haña apoyo di tur hende, pero mi mester a para Cooper bis’é wanta brek mesora”,asina parlamentario Pauletta ta splika.

E ta bisa ku komo firmante di e moshon hinter parlamento liderá pa señor Walroud a indiká ku kier mira kambio den transporte públiko, kier eliminá e fundashon nan ku tin den transporte, bendementu di plachi i mal uso di plachi den gobièrnu. No por ta asina ku Cooper ta invitá e sektor pa bini serka dje pa splika kiko e ta bai hasi i ta hasi komo sifuera e hendenan ta kontra transporte públiko paso nan kier duna nan opinion.

Pa loke ta Tele Curacao Ana Maria ta bisa ku ta pa Cooper su arogansia por mira e desaster ku ta tuma lugá den Tele Curacao.

Ana Maria ta bisa ku e moshon a keda traha pa Walroud inkluyendo hinter sektor di transporte públiko. Den e moshon tin para ku mester a traha algu ku ta inkluí sektor priva i e sektor públiko i esaki no a tuma lugá, Cooper a pone esaki un banda i a invitá nan bini pa e splika nan kiko ta bai bira e lei, pues e no a papia ku nan. E parlamentario ta bisa ku nan a sali for di e punto di bista ku nan tambe lo por tabatin input den esaki.

E ta sigui bisa ku a traha un komishon, pero solamente ku sektor públiko, pues solamente gobièrnu. E moshon ta papia di ku nos kier mehorá transporte públiko den konsulta ku tur partner stratégiko, Cooper  a firma e moshon komo parlamentario i awor ku e ta minister e kier disidí kon e ta hink’é den otro. Pues komo parlamento no tin un bista kiko tin den e lei i a bisé pa ora e ta traha e lei mester involukrá tur sektor pero e lei ta bini riba mesa sin konsultá  ku esnan den e sektor.