FORTUNA—Dos bisiña riba Esmeraldaweg den bario di Kura Piedra/Seru Fortuna,  a pasa dos dia largu bou di awa sin un solushon. Mas serio ainda, no tabatin niun instansha ku por a yuda nan.

Nadine Allen, un dama di Jamaica ku tin 20 aña bibando na Kòrsou a konta Vigilante nan problemanan durante dos dia di yobida. Huntu ku Allen, na mesun tereno riba Esmeraldaweg,  tin un  habitante mas. Un dama bibando ku dos yu kual un beibi di 3 luna.

For di djaluna anochi, momento un yobida a kuminsá aserka Kòrsou, e dos kasnan habitá a kuminsá sinti problema di awa yenando riba e tereno, ku por sierto ta mas ku 2 mil meter kuadra na grandura. E tereno tin e dos kasnan ariba, pero for di un pida mondi patras di e kura un inundashon a start i subi e tereno.

Segun Allen, e la kuminsá ripara awa den kas alrededor di 1’or di mardugá riba djamars momento e yobida, bos i welek tabata riba Kòrsou. E mester a baha fo’i kama pa bai baño, unda mesora a ripara awa na suela di e kas i tabata na un altura di mas ku 15 sentimeter. Allen a keda straño pasobra e tin dos aña bibando na e adrès pero nunka tabatin un inundashon asina serio. E awa tabata keda kologá riba e tereno di kas, pero nunka a drenta paden. Su bisiña tambe a konfirmá na Vigilante mesun kos. Tabata den oranan di djamars mardugá tempran e tambe a bin nota e su kas tabata bou di awa, pero e la risibi un tiki mas awa kompará ku Allen. E dos damanan a tuma hinter dia riba djamars pa saka awa for di nan kas. Ámbos bibienda a keda bastante afektá.

Pero entre djamars pa djarason mainta e inundashon a bin bek. E biaha aki kousando mas daño na e dos flurnan di kas. Tambe tur nan ekiponan eléktriko i elektróniko a daña. Ámbos kas por ehèmpel a pèrdè nan frigider miéntras e bisiña di Allen a pèrdè su frizer tambe. Ayera mester a buska un pikop pa rekohé spikernan i demas ekiponan riba koriente ku no ta funshonando mas. E habitantentenan a pèrdè míles di florin na ekipo, matras i muebles.

Segun Allen “no tin nada ku mi por hasi”. E la deklará na Vigilante di mester a sinta den su kas wak kon awa a destruí tur kos u e tabatin.