WILLEMSTAD – Korte den Apelashon a dikta sentensia luna pasá den un kaso entre Antillean Billboard N.V. i Chobolobo Shopping Center N.V. ku tin algun aña andando ku Antillean Billboarda. E kaso ta trata e hür di un tereno pa pone un “billboard”, di kua Vigilante ya a informá ampliamente tokante di dje na novèmber último, despues ku Korte di Promé Instansia a dikta na fabor di Chobolobo. Den e apelashon akí, tres hues a reevaluá e demandanan di Antillean Billboard i a dikta den bentaha di Chobolobo.

E kaso a kuminsá ku un sentensia den un huisio sumario di 11 di òktober 2022, den kua e hues a kondená Antillean Billboard pa bandoná e tereno spesífiko i paga debe di hür atrasá. Manera Vigilante a informá, Korte a disidí ku Antillean Billboard mester kita tur “billboard” ku nan tin riba tereno di Chobolobo na Schottegatweg Oost i na Mercuriusstraat. E kompania a haña te desèmber 2022 di hues pa hasi esaki. I komo Antillean Billboard no a kumpli ku e kontrakt será pa hür terenonan di Chobolobo, Korte a ordená tambe pa e kompania paga mas di 58 mil florin na debe di hür atrasá.

Antillean Billboard a bai den apelashon kontra e sentensia akí i entretantu Hof a dikta sentensia nobo. Konforme e sentensia di Hof di luna pasá, Antillean Billboard a kumpli ku e sentensia di Korte di Prome Instansia, ku eksepshon di un “billboard” spesífiko ku tin e number di registrashon “32”. Despues di a risibí e sentensia, un dùrwarder a kita e bòrchi akí riba petishon di Chobolobo riba 12 di yanüari aña pasá. Durante e tratamentu den apelashon, Antillean Billboard a entregá 5 demanda. Nan a pidi un karta di despensa na e komersiante ku a pone su propaganda riba e bòrchi “32”, pago bèk dje plaka di hür, kompensashon pa e gastunan di kita e “billboard”, kompensashon pa entrada pèrdí pa motibu ku a kita e bòrchi, interes legal i tambe pa ordená Chobolobo paga e gastunan dje proseso den apelashon.

Korte a rechasá e demandanan akí di Antillean Billboard i a bisa ku Antillean Billboard básikamente ke bini bèk riba desishonnan anterior di Korte. Hof a reevaluá e desishonnan hudisial akí i a rechasá tur e kehonna di Antillean Billboard. Un punto krítiko tabata e propiedat di e tereno ku nan tabata hür. Antillean Billboard a argumentá ku Chobolobo no ta propietario ku derecho riba esaki i ku nan por a pone e “billboard” grátis. Sinembargo, Hof a konfirmá e opinion ku ni maske Chobolobo no tabata e doño legal, no ta konsiderá esaki komo un falta den kumplimentu di e kontrakt di hür ku ámbos partido a sera ku otro.

Ku e sentensia nobo akí, e konflikto entre Antillean Billboard i Chobolobo a keda sin solushon pa Antillean Billboard. Hof a konfirmá e desishonnan anterior, den kua e argumento di Antillean Billboard tokante e propiedat dje tereno no a haña niun klase di base pa para ariba. E bataya legal akí, ku a kuminsá ku e huisio sumario na 2022, ta parse di no a yega na un fin definitivo ainda.