Polis tin informashon ku tin adultonan i menor di edat ainda den e mondi na Ostpunt.

  Willemstad ———Kuerpo Polisial ta hasi un apelashon riba komunidat i prinsipalmente habitantenan ku ta biba den e área mas p’ariba (ost) di Kòrsou pa na momentu ku nan señalá òf keda aserká pa personanan stranhero, pa notifiká polis mesora na e numbernan di telefòn 911 òf 917.

Manera ya kaba nos a publiká, ayera a bin deskubrí algun stranhero ku a yega ku lancha den mondi banda di Mijmaatschappij. Tabata trata aki di adultonan i un menor di edat. Polis tin informashon verídiko ku ainda tin mas adulto i menor di edat den e mondi aki i ta tratando ainda huntu ku otro instansianan pa mas lihé ku ta posibel lokalisá nan. Sinembargo ya mas ku 24 ora a pasa i teniendo kuenta ku probablemente nan lo no tin líkido (awa) huntu ku nan, nos ke reskatá nan na promé lugá i wak nan kondishon di salú pa despues kontinuá ku e prosedimentunan usual pa ku indokumentadonan. P’esei e petishon na komunidat pa mèldu polis mesora na momentu ku tuma nota di un situashon sospechoso òf ku bo ta disponé di informashon òf a keda aserká pa e personanan aki. Nos ta gradisí bo di antemano pa bo koperashon.