Investigashon: Tim di Maneho di Aqualectra a laga un instansha di ekspertonan independiente i internashonal hasi un investigashon.

Otrobanda– Despues di un evaluashon interno ku a tuma lugá durante di e último lunanan, Aqualectra a re-enfoká su esfuersonan pa asina por oumentá konfiabilidat i tambe sigui traha riba stabilidat den produkshon i distribushon di awa i koriente.

A laga un instansha independiente hasi un investigashon di inisidentenan di e dos blackoutnan pa asina por tuma e pasonan pa koregí i evitá e inisidentenan aki den futuro. Na mes momentu a evaluá i adaptá e plan stratégiko di mas aña di Aqualectra, poniendo mas énfasis riba akshonnan ku mester tuma pa oumentá e konfiabilidat di Aqualectra su produkshon i distribushon. Riba término korto, ta invertiendo hopi mas pa entre otro aselerá mantenshon atrasá, oumentá e konfiabilidat di fasilidatnan i tambe e ret di koriente i awa. E maneho riba término largu ta pa implementá inovashonnan nesesario i garantisá komunidat un transishon energétiko responsabel i awa na un preis pagabel.

Akshonnan direkto tumá pa Aqualectra
Despues di e insidentenan ku a kulminá den e dos blackoutnan, e Tim di Maneho di Aqualectra a laga un instansha di ekspertonan independiente i internashonal hasi un investigashon di ambos insidente. A base di e resultadonan preliminar a tuma akshonnan pa fortifiká e sistema di seguridat den e ret di distribushon di Aqualectra. E echo ku ta solamente parti di e ret a keda afektá durante di e brown-out resien ta demostrá ku e intervenshonan hasí ta dunando resultado i ku mester kontinuá ku e esfueronan aki na un forma responsabel. Unabes e rapòrtnan definitivo ta kla, Aqualectra lo publiká esakinan na un forma transparente riba su wèpsait aqualectra.com.

En bista di e temporada di kalor ku nos ta drentando a kuminsá prepará kaba dor di entre otro aselerá mantenshonnan ku a keda atras debí na varios faktor. Di e forma aki por perkurá ku tin sufisiente unidat di produkshon ta funshoná optimal ora e periodo di kalor i ménos bientu yega. 

Ahuste di plan stratégiko di Aqualectra
A base di e evaluashon aki di su plan stratégiko, Aqualectra a alineá su akshonnan pa fortifiká su produkshon i distribushon di awa i koriente, mehorá su situashon finansiero, fortifiká e madures i kultura di su organisashon i traha riba persepshon públiko di e kompania aun mas tantu. Tur esaki mester kondusí na un Aqualectra ku ta mas konfiabel, ku servisio i produktonan pagabel i dirigí riba hasi uso máksimo di fuentenan duradero. Tur esaki mester keda den liña di e transishon energétiko ku Aqualectra ta liderá na bienestar di nos komunidat.

Mas empátiko pa nesesidat di e kliente
Un parti importante di Aqualectra su esfuerso lo sinta den mehorá persepshon di e kompania den komunidat. E diferente esfuersonan ta pa informá, kontribuí na uso mas konsiente di awa i koriente i trese operashon di Aqualectra mas serka di komunidat na un forma transparente. Próksimamente lo lansa un kampaña pa konsientisá komunidat tokante sparmentu di awa i koriente. Lo inisiá tambe ku kontakto mas estrecho ku komunidat pa medio di presensha den bario. Lo intensivá tambe esfuersonan pa frena iregularidat den ret di distribushon i aktua ku man mas duru kontra di ladronisia di awa i koriente. E ladronisia aki ta afektá klientenan ku sí ta kumpli ku Aqualectra, ya ku e loke ku keda hòrtá tin efekto direkto i indirekto riba loke nan ta paga. Finalmente Aqualectra lo komuniká mas tokante su produkshon i distribushon, meskos asina proyektonan ku lo kontribuí na e transishon energétiko.