Willemstad- Na luna di desèmber 2022, Minister Ruisandro Cijntje, huntu ku Ministerio di Desaroyo Ekonómiko (MEO) a reintrodusí temporalmente e areglo di Makutu Básiko 2012. Esaki a sosodé pa medio di un Areglo Ministerial i lo mester a konta pa un periodo di seis (6) luna. Entretantu e seis lunanan akí a pasá i despues di un evaluashon e Areglo ministerial en kuestion a keda prolongá ku tres (3) luna adishonal.

Durante e 6 lunanan tras di lomba, Minister Cijnte a instalá un ‘Task Force’ kende ta enkargá pa kondusí un investigashon profundo riba e efisiensia i efikasia di Makutu Básiko i e posibilidatnan pa eventual alternativanan. E investigashon akí ta kanando debidamente pero ainda no ta asina leu pa por duna un konklushon riba e tema. Depaso, tin aspektonan hurídiko den e proseso ku mester tene na kuenta i ku ta tuma nan tempu.  Mientrastantu e enfoke i deber di Gobièrnu ta keda, pa sòru pa nos komunidat tin akseso liber i hustu na produktonan vital; tantu ku e Areglo aktual komo tambe den kualke konklushon ku e ‘Task Forse lo mester saka for di nan investigashon. E areglo di Makutu Básiko 2012 ta inkluí entre otro produktonan manera aros, lechi, pan i algun fruta i berdura. E areglo den su totalidat ta disponibel riba wèpsait di Gobièrnu.cw pa un i tur ku ke tuma nota di dje.