Willemstad—-Durante wikènt último a tene kontrol rutinario den Sentro di Detenshon i Korekshon Kòrsou (SDKK). Esaki komo parti di mantenshon di òrdu i seguridat den e instituto, pa tantu kliente komo e personal ku ta laborá por ta den un ambiente sigur.

E kontrol rigoroso akí a tuma lugá den vários blòk di prizòn i a logra konfiská:
– kantidat di telefòn selular di diferente marka,
– vários kargadó i ‘earplug’,
– droga,
– 1 arma di kandela ku munishon,
– vários opheto skèrpi ku ta usa komo arma blanku.

E arma di kandela a wòrdu konfiská den blok 7 i asta tabata ser bisa ku tabata pertenese na un detenido ku tin kastigu pisa den kaso di asesinato.

A konfiská tur e ophetonan akí pendiente mas investigashon pa determiná kon e klientenan di e instituto por a yega na e ophetonan akí. Lo sigui tene kontrol no anunsiá den e instituto pa asina salbaguardiá seguridat di personal, kliente i bishitante tur momento. Danki na e tim spesial pa e bon trabou realisá durante e wikènt tras di lomba.