ARNHEM—Munisipio di Arnhem ta bai tuma 200 refugiado adulto èkstra despues di un yamada urgente di gobiernu pa buska lokalidat pa refugiadonan.

Asina e munisipio ta duna oido na e yamada di sekretario di estado demishonario Van der Burg di Hustisia. Pa motibu di e preshon enorme riba e sentro di registrashon na Ter Apel ta buskando mas lokalidatnan. Na Arnhem a yega ayera nochi na Rijnkade un barku ku 95 kama pa refugiadonan segun Omroep Gelderland. Den fin di siman ta bini un segundo barku krusero ku ta duna akomodashon na mesun tantu hende. Arnhem kier akomoda e adultonan pa motibu di seguridat. Na Nieuwe Kade na Arnhem tin 4 barku pa refugiadonan ku ta pidi asilo i dos boto pa akomodashon di refugiadonan ukraino. Arnhem ta akomoda un total di 2900 refugiado. Diputado Smeulders ta kontentu ku Arnhem por tuma responsabilidat pa hendenan ku ta hui pa guera i violensia. Nos ta spera ku otro munisipionan sigui e ehèmpel. Ta nos tarea konhunto pa kontribuí na akomodashon di solisitantenan di asilo. E dos ekstra barkunan krusero por keda dos luna den Arnhem. Despues no tin lugá mas pasobra mester renoba Rijnkade. Zwolle tambe a duna oido na e mandatario. Alkalde Snijders a bisa ku el a traha lugá pa 60 solisitante di asilo. No ta konosi unda nan ta bai. Pa basta tempu e sekretario di estado ta hasi esfuersonan pa reparti e solisitantenan di asilo di manera hustu den e munisipionan. No ta sigur si nan ta logra ku e lei di repartishon. Tweede Kamer lo trata esaki otro siman.