BLOEMHOF– E aña aki historia i herensia di sklabitut ta risibí hopi atenshon. Henter Reino Hulandes ta papiando al respekto i Landhuis Bloemhof a krea un plataforma pa interkambio: Sorry,… eksposishon, dialogo i un anochi ku presentashonnan variá. Sentral den tur esaki ta nos eksposishon Sorry,…, den kua diesnuebe artista visual a reakshoná riba e despensa di Hulanda pa nan papel den sklabitut.

Den e seri di artikulo akí nos ta introdusí e artistanan di e eksposishon Sorry,… i nan obranan.  Awe e dos últimonan: Margarita Haakmat i Raily Yance.

Margarita Haakmaat su obra, ‘Tula warda no wak ainda,’ ta mustra un collage di pintura i teksto. Margarita Haakmat semper a ninga di studia nos historia di sklabitut promé pa evitá pena i doló. Preparando pa e trabou aki e mester a hasié tòg. Tratando di komprondé kon e historia di sklabitut aki a formá nos pueblo, el a keda hopi emoshoná. Tin hopi kos trosé ainda. Anto ku su lucha pa Libertat, Tula a siña nos kon lucha pa nos balor propio i stòp di bringa otro.  Si Tula tabata tei awe, sigun Margarita e lo a bisa:”Nos ta aseptá e despensa. Basta awor. Sperando algu real awor despues di e koma.’

E artista nasé na Venezuela Raily Yance su obra ‘Puertas’ ta dos pintura ku por mira komo porta, of bentana. Depende kon bo mire. Yegando Kòrsou Raily a keda asombrá kon nos ta usa kosnan di tur dia akinan. Esei a yuda inspirá e obra aki. Pesei el a traha dos porta, un habrí, un será.
E ambiguidat di kosnan manera pidi despensa publikamente ta keda reflehá akinan.
Por bishita e eskposishon Sorry,… te ku djasabra 19 di Ougustus na Landhuis Bloemhof.
  
Por a realisá e proyekto akí danki na e aporte di Vertegenwoordiging van Nederland na Kòrsou, Carrying Narratives i Prins Bernhard Cultuurfonds Caribisch Gebied.