WILLEMSTAD,—-Dia 30 di yüni i 1 ku 2 di yüli próksimo lo tuma lugá e di dos edishon di “Hak’é Curaçao Summer Festival”. Un festival ku a konosé su promé edishon na aña 2022, ku e meta pa selebrashon di dia di bandera di Kòrsou.

E organisashon di “Hak’é” den kolaborashon ku nan partner prinsipal “Curaçao Airport Holding ‘CAH’” i tambe Ofisina di Turismo ‘CTB’ no a spar nan esfuersonan pa por trese un ‘line-up’ impreshonamentu ku artistanan sumamente popular internashonalmente, kombiná ku artista lokal ku sigur hopi éksito.

HCSF Festival kaminda artistanan lokal manera Ephrem J. i tambe Axel & Orchestra ta kompartí esenario ku artistanan internashonal manera Prince Royce, Elvis Crespo, UB-40, i Kassav. Dos dia ku ta mustra di bira un éksito sigur.

Djadumingu lo transformá e sitio pa asina e públiko por akudí na e “Hak’é Food Festival”, konsentrando riba nos kultura musikal i kumindanan tradishonal. Ya tin palabrashon pa Kompèr i Grupo Grik ta den e ‘line-up’ i ta planiando algun sorpresa mas.

Pa loke ta trata e promé anochi, ku ta djabièrnè, dia 30 yüni awó, lo bai tin Ephrem J, Elvis Crespo i Prince Royce. Riba e di dos dia lo bai tin Axel & Orchestra, UB40 i Kassav.

Ta asina ku “Hak’é Curaçao Summer Festival” den su di 2 edishon ta pinta di bira un espektákulo musikal ku su ‘foodcourt’ i ‘funzone‘, manera a bin ta kustumbrá di e tim di “Hak’e”, den tur lokual ku nan organisá.

Un fin di siman kaminda lo bai selebrá dia di bandera espektakular.