Tapa: un agente polisial i funshonario di ambulans ta tapa e kurpa sin bida di Pinnock.

Schottegatweg—Un kaso di Hit & Run ku a tuma lugá riba 2 di òktober 2022, ainda ta sin solushon. Riba e dia spesífiko, e hòmber Maurice Orlando Pinnock, nasé na Jamaica 28 di ougùstùs 1970, a bin pèrdè su bida.

Ta trata di un aksidente riba Schottegatweg West na unda un vehíkulo a pasa dal Pinnock riba su baiskel i sigui kore bai. Te awe, polis no a logra solushoná e kaso lamentabel. Na yegada di e sitio, polis a bin haña un baiskel kibrá bentá den serkania di e víktima i un pia di kèts koló blanku di e marka Nike  riba kaminda. Probablemente un vehíkulo lo a alkansá e siklista i sigui kore.  Na e sitio a bin topa ku parti di un lus di brek ku ta pertenesé probablemente na e vehíkulo ku a alkansá e víktima pa despues kore bai. Tambe a tuma nota di marka di brek basta largu riba kaminda ku por indiká ku e vehíkulo tabata moviendo ku un velosidat basta moderá. Pinnock tabata riba un baiskel koló blou na momento di e impakto. Ministerio Públiko a pone un rekompensa pa tep di oro sin éksito. Pa duna informashon riba e kaso, por yama e number anónimo di polis 108.