WILLEMSTAD,—-No ta un sekreto ku mundu di tambú, tin un temporada largu ku esaki ta pará ketu. Práktikamente no tin niun fiesta di tambú tumando lugá. Esaki sigur ta birando alarmante pa fanátikonan di e género musikal kultural ku ta na soño.

No tin grabashon ta tumando lugá. No tin nada ta tumando lugá rondó di e género musikal tampoko. Pa ku esaki Vigilante Farándula, a drenta den kontakto ku e legendario kantante kompositor i alabes fundadó i doño di grupo “Pincho i su Grupo di Tambú”, kende ta Sherwin “Pincho” Anita.

Ta asina ku Vigilante Farándula a puntra “Pincho”, kiko ta pasando ku e género musikal di tambú i di kon no tin nada ta pasando rondó di e género musikal, unda ku tampoko no tin grabashon tumando lugá. Tabata aki ku “Pincho” a duna di konosé lo siguiente:”Ami si semper ta kue e toro dirèkt na su kachu. Laga mi, ami “Pincho” Anita, bisa bo kiko ta e problema mayó i alabes prinsipal ku tin den mundu di tambú aki na Kòrsou.

E problema ku tin, ku no tin nada ta tumando lugá rondó di gruponan di tambú, ta ku e asuntu di pèrmit. Esei ta e problema di mas grandi ku tin. Tantu gruponan i/òf personanan ku ke organisá un fiesta i/òf evento di tambú, tin ku kana un kaminda di krus pa nan por haña pèrmit. Banda di esei na momentu ku bo pidi pèrmit, bo ta haña kontesta algun dia promé ku bo evento tin ku tuma lugá. Pues e organisadónan no ta haña sufisiente tempu pa nan por promové nan evento.

Dia ku regulá i atendé na serio ku e asuntu di pèrmit aki, kere mi ku mundu di tambú lo bai bira manera ku esaki tabata den pasado. Paso den pasado no tabatin e kosnan aki, paso e tempunan aya, tabatin hopi rèspèt pa nos kultura. Pero awendia ta manera ku nan ke mata nos kultura, lubidando ku un pais sin kultura, ta un pais sin direkshon.