Presidente Maduro, ku ta purba di konsolidá su posishon na kaminda pa elekshonnan di
presidente di 2024.
Willemstad,– E Servisionan di Informashon Hulandes, Servisio di Informashon i Seguridat Militar MIVD i Servisio di Informashon i Seguridat General AIVD, a start konhuntamente un investigashon di e desaroyonan polítiko i militar na Venezuela. Esei ta pará den e Relato anual Públiko di ámbos servisio, ku a publiká.
Atenshon spesial ta bai na e posibel efektonan ku e desaroyonan aki por tin riba Reino Hulandes, pa ta mas eksakto riba e islanan Aruba, Boneiru i Kòrsou.
Guyana
E enfoke di e investigashon ta riba e aktividatnan di e régimen di presidente Maduro, ku ta purba di konsolidá su posishon na kaminda pa elekshonnan di presidente di 2024. Resientemente Venezuela a intensifiká e tenshonnan den region pa medio di un referèndem tokante status di e área di Essequibo, un region ku ofisialmente ta pertenesé na Guyana, pero ku Venezuela ta reklamá.
Despues di e referèndem e régimen di Maduro a deklará e área komo teritorio Venezolano, apesar di resistensia internashonal i e promesa di ámbos pais pa no solushoná e problema ku medionan militar.
Aktualisashon
Den kuadro di e desaroyonan aki marina Venezolano, ku a selebrá aña pasá su di 200 aniversario, a modernisá su fleta. Ounke hopi di e renovashonnan tabata prinsipalmente kosmétiko, a ehekutá aktualisashonnan signifikante riba algun barku di patruya klase Guaiqueri, ku ta ekipá ku misilnan kontra barku nobo. Ademas Venezuela a kumpra unidatnan di superfisie nobo, manera un barku pa vigilá kosta, un barku di apoyo logístiko i boto nan di atake rápido.
Koperashon
Apesar di e invershonnan aki ta keda eksistí problema dentro di ehérsito Venezolano, manera eskases di personal, edukashon defisiente i mantenshon atrasá, di moda ku e nivel di preparashon ta keda abou. Tambe Venezuela ta sigui sera koperashon militar ku paisnan manera Iran, Rusia i China.
Na mes momento e régimen Venezolano ta lidia ku kòntròl limitá riba nan propio teritorio, kaminda diferente gruponan armá iregular, ku ta varia di agrupashon gueria te bandanan kriminal, ta dominá partinan signifikante di e pais.
Segun e servisionan e resultadonan di e investigashon aki ta importante pa seguridat di e partinan Karibense di Reino Hulandes, teniendo na kuenta e proksimidat i e menasanan potensial ku ta basá riba e instabilidat na Venezuela.