Atrako kaminda un víktima a bin fayesé.

Nieuwe Haven,– Aktualmente un kaso datá for di 2019 ta yegando den su fase final. E último dos akusadonan ta dilanti hues kaminda 1 akusado ya a risibí un kondena i e otro akusado su kaso ta habri bèk pa wòrdu tratá na yüli próksimo.

Ta trata di un kaso ku a tuma lugá riba 7 di mei 2019 kaminda malechornan ku mal intenshon a atraká dos hòmber asiátiko den Schelpwijk. Pa despues intentá pa drenta den un kas kaminda e persona ku tabata biba den e kas wòrdu asesiná. Kuater di e sinku hòmbernan ya a keda kondená, pero solamente Swendly Martina mester presentá dilanti hues riba 4 di yüli 2024.

Segun investigashon penal tabata tin un kolaborashon amplio entre tur e hòmbernan embolbí. Ta trata di e hòmbernan Jonathan Hansen kende a keda kondená na 20 aña, Richendrik Hansen kende a risibí 13 aña 8 luna, Ruwensley Pisas kual mester sinta 14 aña, Thaino Mathilda kende a risibí ayera 9 aña i 8 luna i Swendly Martina kende su kaso ketubai ta andando.

E investigashon a nota ku e hòmbernan tabata tin un plan amplio pa kometé atrako riba 7 di mei 2019 den oranan di anochi. Ta asina ku e hòmbernan tabata kore e anochi konserní den un vehíkulo di hür di marka Hyundai Accent. E akusadonan tabata kore rònt pa asina buska hende pa atraká. Ta asina ku e personanan a kita e plachi number pa evitá ku e outo ta wòrdu rekonosé i durante di e atrako tur hòmber tabata tin kara tapá.  Mas aleu, tur akusado tabata tin paña skur bistí.

Sinembargo outoridatnan a konkluí ku koriente rònt den e vehíkulo di hür, e akusadonan tabata repartí e armanan ku otro kaminda e sospecho tabata ku tabata tin 4 arma den e outo. Un dje armanan aki tambe a wòrdu usá pa asesiná e víktima ku fam Molenaars.

Unabes koriente rònt den kayanan di Kòrsou, e hòmbernan a opta pa sigui e outo kaminda dos persona chines tabata sintá aden. E sospecho tabata ku e hòmbernan a kaba di sali Casino, pues chèns ta grandi ku e hòmbernan lo tin sèn kèsh riba nan. E grupo a sigui kore tras di e outo dje chinesnan kaminda dado momentu den kayanan den Schelpwijk e atrako a tuma lugá.

E atrako di e hòmbernan asiátiko a finalisá ku e grupo a hòrta un kantidat di 610 florin, un telefòn di marka Honor 10 i dokumentashon personal di e hòmbernan chines.