FKP lo duna yabi awe na sentro di bario Sapaté.

Willemstad,– Awe 4’or di atardi Fundashon Kas Popular lo entregá yabi di sentro di bario Sapaté.

Despues di algun temporada di renobashon awe 4’ or Fundashon Kas Popular(FKP) lo entregá yabi na maneho di sentro di bario Sapaté. Tantu Minister di VVRP Charles Cooper komo gerensia di FKP lo ta presente durante e entrega di yabi. E entrega lo tuma lugá na e sentro di bario situá den kaya Isais S. Pimentel.

Sentronan di bario ta esensial pa hasi un bario mas habitabel. Awor habitantenan den Sapaté lo bai tin e oportunidat pa partisipá na diferente aktividat sin ku nan mester bai muchu leu for di kas. Diferente investigashon na Hulanda a enfatisá e importansia di sentronan di bario den barionan sosial. Segun buurtwijs.nl, un sentro di bario mester fungi komo un “eko-sistema” di e bario. Riba e forma aki habitantenan di e bario lo drenta mas fásil den kontakto ku otro resultando ku e bario lo bira un bario mas agradabel pa biba aden.

Último dos añanan tin diferente moveshon positivo den e bario di Sapaté ku meta pa drecha e situashon sosial den e bario. For di yüli 2021 e edifisio bieu di SV Abrahamsz ta pendiente pa wòrdu kumprá dor di Fundashon Care4U. E edifisio pendiente kompra lo fungi komo un sentro di aktividat pa hóben nan den e bario. For di yüli 2021 Fundashon Care4U tin opshon pa kompra pero lamentablemente e proseso di benta ta pegá na Domeinbeheer. Riba diferente okashon e fundashon a limpia e vèlt di futbòl pegá ku e edifisio. Den oranan di atardi por sierto e vèlt di futbòl chikí semper tin mucha ta hunga bala ariba, pues ta interesante pa wak kon e sentro di bario lo yuda i fasilitá e aspekto sosial den e bario.