WILLEMSTAD,—-Tempu ta pasa asina lihé i promé ku bo pensa ya nos ta pará den porta di fin di aña pa asina kana drenta aña nobo i den e kultura karnavalesko i tambe festival di tumba, esaki ta e luna ku tur hende ta kuminsá ku nan preparashonnan. Esaki ta konta tambe pa kompositornan ku ta partisipá den festival di tumba.

Vigilante Farándula a papia ku Axel Pikero i den e kombersashon a bin dilanti festival di tumba i sin a pensa dos bes, Axel a papia riba plannan ku e tin, inkluso e korona di festival di tumba 2024.

Mas aleu Axel a sigui bisa ku ta for di aña 2006 el a mishi ku e korona, kaminda e tempu ei el a komponé i areglá pa Reinier Lijfrock ku e tumba “Esaki ta mi soño”. Na aña 2014 Axel a hera ku Rich Pieter ku e tumba “Oloshi”, pero tambe el a realisá ku hera no ta konta den festival di tumba. E kompositor Axel Pikero a sigui komponé tur aña di nobo i kasi a logra e korona, huntu ku DjuDju-V ku e tumba “Pa Mundu”. Axel a bisa Vigilante Farándula: “mi tin ku bisabo ku ya mi ku DjuDju-V a sinta ku otro i nos a deliberá riba basta pida kos i nos meta ta pa 2024 sí kue e korona, pasobra pa mi ta franko ku bo, awor si e ora e yega, for di aña 2006 esaki ta nifiká ku ta 17 aña pasá”.