Momentu di e reunion ku a tuma lugá ayera tardi na ofisina di MEO.

WILLEMSTAD,—-Ayera tardi MEO a yama un reunion di suma importansia. Ta trata aki di un reunion kaminda ku tabata tei presente, promotor i tambe doñonan di diferente sitio, tantu esunnan Hulandes, pero tambe esunnan lokal.

T’asina ku un fuente a duna Vigilante Farándula di konosé ku no a bin masha hopi kos den e reunion. Práktikamente tur loke ku a papia ayera, a papia tambe dia 5 di yüni último. Loke ku a bin aserka ta e echo ku, for di ayera MEO a subi kaya i asina kuminsá kontrolá na diferente sitio ku tin aktividat ta tuma lugá.

Awe nochi tambe lo bai ta mes un kaso i esaki ta sigui bai tur e wikèntnan ku ta bai drenta. MEO sigur lo bai ta hopi skèrpi durante di e kontròlnan. Vigilante Farándula a trata na drenta den kontakto ku señor Ronny Cornelis na algun okashon, pero sin resultado deseá.

Mas despues Vigilante Farándula a drenta den kontakto ku Dòkter Izzy Gerstenbluth, ku tambe tabata den e reunion, pero mester bisa ku Dòkter Izzy Gerstenbluth, tabata den un otro reunion i esei a hasi imposibel ku por a haña su reakshon di e reunion di ayera tardi.

Finalmente Vigilante Farándula a drenta den kontakto tambe ku Gregory Gonzalez, kende a bisa lo siguiente: “E intenshon di Gobièrnu ta pa mantené mas tantu posibel farándula habrí. Anto pa nos logra esei un dado momentu, e doñonan di sitio i promotornan mester mantené nan mes mas tantu posibel na e reglanan di konforme di e Dekreto Ministerial di COVID. Paso dado momentu, mas bo mantené na e reglanan, ménos kaso sigur nos lo haña di e kontagio di COVID, pa motibu di farándula. Esaki ta nifiká ku tur hende mester bai fiesta i òf otro aktividat ku nan karchi di bakunashon, kaminda ku ta mustra ku nan ta bakuná kompletu, mas di dos siman kaba òf un PCR òf un Antigeen tèst. Si nan no tin esakinan, nan no por drenta den ningun sitio, plùs loke ku tambe ta importante ta ku sitio será ku èrko por tuma 50% di kapasidat. Na final mi ke bisa bo, pa tur hende pa respetá i pone disiplina dilanti, paso kere mi ku nos niun no ke bai den un ‘lockdown” atrobe”.

 Esaki ta nifiká ku awor farándula su eksistensia ta den man di promotornan i tambe doñonan di sitionan ku ta pone fiesta i otro aktividatnan. Si nan mantené nan mes na e reglanan ku Gobièrnu di Kòrsou a stipulá i tambe pone atenshon ku e kontròlnan na porta, paso esaki ta e úniko manera pa farándula por keda drai. Si dado kaso ningun hende no mantené nan mes na e reglanan i e sifranan keda subi, gobièrnu por yega na e desishon pa sera farándula un biaha mas. Pues manera Gregory Gonzalez a bisa, tur hende mester mantené disiplina ku rèspèt i si bo no a bakuná i bo no ke pasa Antigeen Tèst, preferibel bo keda bo kas, ku e forma ei tambe bo ta yuda na mantené e sifranan abou.