Ketu bai hopi hóben i mucha no sa di e liña di ayudo 918.

Willemstad,– Relashoná ku algun video di maltrato di mucha ku tabata sirkulá riba ret sosial ta importante pa informá ku e number 918 ta alkansabel pa yuda tantu hóben i mucha ora nan tin problema.

For di 2006-2007 e number 918 ta alkansabel pa hóben nan ku tin problema na kas por bèl. Pero pa un rason òf otro ketu bai hopi hende no ta na altura di e number aki. E number ta wòrdu manehá dor di fundashon Kinderbescherming Curaçao i tras di 918 tin mas ku 15 boluntario ku a risibí treinen adekuá pa duna konseho i informashon na hóben nan ku ta den un situashon inkonfortabel. E treinen ku ta dura alrededor di 6 siman ta duna e boluntario eksperto sufisiente konosementu pa yuda e mucha.  Por yama e number prinsipal di 918 kompletamente grátis i alabes por chèt ku un boluntario riba un forma anónimo. Riba wèpsait 918.cw tin un video informativo ku splikashon mas amplio tokante e liña di telefòn.

E boluntarionan por  yuda pensa tokante un solushon, duna konseho i alabes referí pa ayudo adishonal. Ademas riba 918 por papia riba kualke tópiko. Por papia tokante situashon na kas, situashon na skol, situashon di tentamentu òf situashon nan emoshonal. Por tuma kontakto ku 918 entre djaluna pa djabièrnè for di 10 or di mainta te 18 or di atardi. Riba djasabra e number ta habrí di 12 or di mèrdia pa 18 or.