Sigui nos página di FB i Instagram pa bo keda na altura di e desaroyonan di Fundashon Plòns Kòrsou.

Willemstad 12 di yanüari 2023, — Fundashon Plòns Kòrsou (FPK) a tene su promé seshon di KòmberSA. KòmberSA ta un konsepto pa habri kòmbersashon tokante e tabú i stigma di HIV/AIDS. Den e promé edishon di kòmberSA, FPK a invitá algun miembro di prensa i media pa hasi un presentashon i duna mas detaye di e situashon aktual di HIV/AIDS riba nos isla.

Tambe a presentá e plannan di FPK tin pa 2023. HIV ta un vírùs, si bo bebe bo remedi i sigui bo tratamentunan manera debe ser bo por hiba un bida normal sin kore rísiko pa kontagiá otro persona. Si bo ta seksualmente aktivo, ta importante pa bo tèst kada 6 luna pa evitá ku bo ta lat pa tratamentu.

Hopi interesante tabata pa mira e interes ku prensa i media a mustra pa e tópiko aki i alabes pone nan mes disponibel pa duna sosten na e kousa pa huntu nos por konsientisá nos komunidat. Un di e puntonan hopi importante ku a bin dilanti ta edukashon seksual bou di hóbennan. FPK ta para habri pa krea kolaborashon ku diferente organisashonnan pa atraé spònsernan i donashonnan pa yuda ku e kousa di aseptashon i kombatí stigma i tabú di HIV/AIDS den nos komunidat. Keda pendiente pa e siguiente seshon di kòmberSA ku pronto nos lo organisá pa sigui duna informashon i konsientisashon.

Pa donashon i mas informashon balioso tokante e tópiko aki por bishitá nos wèpsait www.fundashonplons.com òf tuma kontakto ku FPK na +59995115853.