Eksagerá: awor ku Korte di Apelashon a prekalkulá e daño na 260 Mion, ta sali na kla ku for di 2018 Banko Sentral tabatin akseso (rekuperá) di mas ku 600 mion florin.

SKALO— Banko Sentral definitivamente a suministrá mal informashon na komunidat di Kòrsou. For di Yüli 2018, apénas algun siman despues di e medida di emergensha, ya tabatin sufisiente aksesibilidat bèk na fondonan di Ennia, sin tabatin mester di krea pániko serka penshonadonan . (Den transkurso di dianan, Vigilante tei saka algun mota ku nunka a keda publiká durante tratamentu di e último kaso den Apelashon. E notanan ta duna un otro di bista riba Ennia i Vigilante tabata e úniko medio di komunikashon presente den sala durante e siman di tratamentu).

Unu di e invershonnan ku Hushang Ansary a hasi den afèr Ennia tabata akshonnan den e kompania Kirby Corporation. Riba Kirby Corporation, no tabatin embargo/beslag imponé. Tabatin 2400 akshon di Kirby Corporation ku Ennia Caribe a risibí na 2017. E invershonnan den Kirby tabatin alrededor di 140 mion dòler na balor. Despues di 2017, Banko Sentral a forsa pa bende un parti di e invershonnan den Kirby. A opta pa bende un parti di e bolsa na 84 dòler pa kada akshon, unda a resultá un ganashi di 24 mion dòler ku benta di un parti dje akshonnan den Kirby, ku ta mas ku 45 mion florin.

Na momento a bende e akshonnan den Kirby, einan tambe Ennia a risibi sèn kèsh di 84 mion dòler, kual ta ekivalente na un suma di 152 mion florin. E Komishon di Resolushon, tabata opiná ku e bolsa di invershon den Kirby tabata demasiado riskante, un argumentu kuestionabel, mirando ku na momento a bende e akshonnan tabatin 45 mion florin di ganashi. Despues di a bende Kirby na 84 dòler pa kada akshon, e balor riba bolsa di balor estado unidense di Kirby a subi i yega kasi 90 dòler, kousando un oportunidat pa mas ganashi mionario.

Pues na dado momento rondó di 5 i 6 di Yüli 2018, tabatin 250 mion dòler aksesibel na Meryll Lynch miéntras a bende 84 mion dòler na akshonnan den Kirby. Ta trata di un aksesibilidat di sigur 607 mion florin, ku ya Banko Sentral tabatin akseso riba dje for di medio 2018. E suma ta dòbel di lokual te ainda, Korte di Apelashon a konkluí a wòrdu kousá na daño den Ennia, esta 260 mion florin. I no tabata trata di rekuperashon sino mas bien, tur e invershonnan i tambe sèn kèsh tabata na nòmber i riba kuentanan di Ennia Caribe Holding/Leven.

Na Sèptèmber 2023, ainda e balor di Kriby a mantené na 85 dòler pa akshon, pa lokual no tabatin motibu pa bende esaki na 2018. Entretantu, ta sospecha ku Banko Sentral a bende tur e demas akshonnan den Kirby pa un suma deskonosí, lokual ainda ta oumentá e aksesibilidat na riba 600 mion florin.

Aparte di a logra maneho riba 600 mion florin, Ennia Caribe Holding ta kobra anual alrededor di 200 mion florin na pólisa di seguro, Bida, Daño i Malesa. Pa Penshun por ehèmpel e kompania ta saka apénas 50 mion florin. Pues, Ennia tin mas ku sufisiente kapital sirkulante pa mantené su mes siguiente añanan.