OFAC: RdK a risibi prolongashon di nan lisensia OFAC. E lisensia aki no ta outorisá pa permití pa konsolá debe di PDVSA mediante entrega di produktonan petrolero.

Isla—Presensha di dos kompania for di Panamá i ousensia di un lisensia pa saka krudo for di Venezuela, ta motibunan prinsipal ku bankonan lokal ta mirando e dil pa Caribbean Petroleum Refinery (CPR) ku mas koutela.

Miéntras OFAC a prolongá e lisensia di RdK pa por transbordá produktonan petrolero, ainda Caribbean Petroleum Refinery no por presentá un lisensia OFAC pa un kantidat di 500 mil bar’i di fuel oil den tankinan di Bullenbaai. I chèns ta grandi, ku e lisensia resien prolongá di RdK, no ta aplikabel pa e entrega di e fuel oil for di Venezuela na sèptèmber último.

Pa 2023, Refineria di Kòrsou a risibi un prolongashon di nan lisensia. Esei ta un lisensia ku ya nan tabatin den nan poder pa por transbordá òf transportá krudo òf derivado ya konosí pa OFAC. Pero na Sèptèmber último, CRU di Kòrsou a partisipá na un transborde di 500 mil bari di fuel oil for di Venezuela sin e lisensia adekuá. E transakshon finansiero i pago tabata un pago di debe for di PDVSA pa un kompania na Panamá, United Petroleo Corporation. Caribbean Petroleum Refinery a uza un akuerdo ku CRU pa pone e fuel oil den tankinan di Bullenbaai, sin tabatin un lisensia pa esaki. Konsekuentemente, CPR i kisas hasta CRU i UPC ta kore riesgo di sanshon imponé pa OFAC. E riesgo aki ta pone bankonan lokal tuma distansha promé nan studia e posibilidatnan di hasi transakshonnan ku CPR.

Pero, CPR ta wak e kosnan otro i ta pensa ku no tin riesgo ku OFAC. Segun CPR, den e transakshon ku a tuma lugá na sèptèmber último, e kompania ku tin derechi pa manehá Refineria di Kòrsou i Bullenbaai, Curaçao Petroleum Refinery no a risibi ningun pago for di PDVSA. Ademas CPR no tabatin nada di haber ku e akuerdo entre doño di e fuel oil, United Petroleo Corporation i e kompania enkargá ku diligensia logístiko, Knob Trading. Ta bin resultá, segun dokumentashon di e konsultorio legal, InterJuris di Miami, entre CPR i Knob Trading tin un akuerdo di almasena (na Bullenbaai) i tabata UPC i Knob Trading ta enkargá ku responsabilidat di propiedat i distribushon.

Awor ku a keda determiná ku e fuel oil na Kòrsou no ta propiedat ni di Venezuela i tampoko PDVSA, CPR di Kòrsou no mester tin prekupashon riba sanshon. Ademas, den e transakshon ku a envolví CRU di Kòrsou, gobièrnu di Venezuela no a risibi sèn, sino mas bien PDVSA via di fuel oil a paga un debe eksistente na UPC di Panamá. I UPC a uza CRU i Bullenbaai, via di Knob Trading pa depositá e fuel oil den tankinan na Bullenbaai. Segun InterJuris, e kompania di grupo Giusti ku derechinan riba Isla, CPR, no ta koriendo riesgo pasobra nan no tabata envolví den ningun transakshon finansiero den e lote di fuel oil entrega na Bullenbaai.

Ademas, CRU, CPR i UPC huntu ku Knob Trading tur  ta kompanianan pafo di e teritorio venezolano i teritorio estado unidense. Kombinando demas hechos, e ofisina di InterJuris ta konkluí ku ningun di e kompanianan den e transakshon di krudo a violá sanshonnan imponé riba Venezuela di parti di Estádos Unídos. Segun direktor di Refineria di Kòrsou, Patrick Newton e kargamentu di 600 mil barí di fuel oil den Bullenbaai, tin outorisashon via di un lisensia di OFAC. Newton den un deklarashon na Vigilante konfirmá ku RdK a laga chek tur kos promé aseptá e karga di fuel oil.

Pero, ta kuestionando si e lisensia ku Newton ta papiendo di dje, por ta aplikabel pa e transakshon spesífiko di sèptèmber último. Debí ku ta trata di un transakshon di debe for di PDVSA, OFAC ta pone otro kondishonnan pa otorgá un lisensia. Esei tabata unu dje motibunan prinsipal dikon CPR a laga traha un konseho pasobra nan no tabatin outorisashon di OFAC pa pone e fuel oil, ku awor ta indikativo di ta kontrabanda, den tankinan di Bullenbaai.