AMSTERDAM—Apesar ku Tweede Kamer a redusí e plan pa belasting adishonal pa bankonan, e bankonan ta keda malkontentu ku e intenshon.

Pero bankonan lo no menasa ku bai for di Hulanda manera VVD a pronostika. No ta konsidensia ku e dos bankonan mas grandi ING i Rabobank a tene un reunion ku periodistanan na momentu ku tabata debati den Den Haag riba e belasting adishonal pa bankonan. Tweede Kamer kier a yuda kaha di gobiernu ku 350 mion euro pa aña ku e ekstra belasting pa bankonan. Despues di un ahuste e suma a yega 150 mion euro. Bankonan no tin bon palabra pa esaki. Awor ku bankonan ta hasi mas ganashi nan mester paga mas belasting. Yena un buraku den presupuesto ku ekstra belasting pa bankonan ta un mal idea segun asosashon di bankonan.