Punda,– BearingPoint Caribbean, un proveedor di atministrashon gubernamental digital pa kasi kuater dékada, ta bai kuminsá un kapítulo nobo den su eksistensia. Entrante 15 di aprel, e kompania tin un marka komersial nobo: Blyce.

Un Kaminda Distinto pa Kresementu

BearingPoint Caribbean (awor konosí komo Blyce) anteriormente tabata forma parti di BearingPoint, un firma di konsulta mundial den IT. For di 2010, el a operá independientemente, kreando un área di spesialisashon eksitoso den desaroyo di solushonnan di software spesífikamente pa agensianan gubernamental. E solushonnan ei ta pèrmití outoridatnan pa brinda servisio, imponé regulashonnan i kobra pagonan na un manera efisiente. E enfoke stratégiko akí a katalisá un kresementu signifikante pa Blyce. Un tempu e empresa tabata sirbi solamente gobièrnunan den Karibe Hulandes, miéntras awor e ta sostené 18 pais rònt mundu, inkluyendo Anguilla, Grenada, Ghana i e Islanan Marshall. A base di e eksito aki, e kompania ta kambia su nòmber pa reflehá su enfoke aktual mihó.

Blyce: Bista Nobo, Mesun Dedikashon

“Blyce ta representá esensia di loke nos ta awe,” segun Avinash Grootens, CEO di Blyce. “Nos balornan fundamental i nos dedikashon na nos klientenan ta keda meskos. Nos ta e mesun tim dediká ku ta ofresé solushonnan inovativo i servisio eksepshonal. E kambio di nòmber akí ta marka un kapítulo nobo eksitante, ku ta impulsá nos pa sirbi nos klientenan mas mihó ainda riba un skala mundial.”

Alkanse Mundial

 Karibe Hulandes, ku un tempu a fungi komo kuna pa e empresa, awor ta sirbi komo trampolin pa su alkanse mundial. E demanda pa solushonnan efisiente den atministrashon fiskal, maneho di seguridat sosial i prosesamentu di lisensia/pèrmit ta ekstendé hopi mas leu ku e islanan. Blyce ta reflehá e enfoke global akí miéntras ku e ta mantené e raisnan karibense.

Un Patrimonio di Inovashon

Blyce lo sigi den e pasonan di BearingPoint Caribbean pa empoderá gobièrnunan ku teknologia inovativo. Pa 39 aña, e kompania tabata un sosio konfiabel, ku a traha huntu ku gobièrnunan pa optimalisá operashonnan, mehorá efisiensia i yuda haña fondo pa desaroyo di pais.

E Promesa di Blyce

“Blyce ta mas ku solamente introdukshon di un nòmber nobo,” segun Franco Diaz, Direktor Ehekutivo. “Blyce mester ta e intersekshon di eksperiensia, teknologia i propósito. Probechando di e historia riku di BearingPoint Caribbean, nos ta ekspandé nos alkanse i ambishon. Blyce ta honra nos pasado, miéntras e ta impulsá nos padilanti.”

Tokante Blyce

Blyce ta ofresé un potente konhunto di solushonnan di software diseñá pa nesesidatnan spesífiko di nashonnan chikí i esnan den desaroyo (SIDS) ku ta pasando den un transformashon di servisio públiko. Su tim di mas ku 140 eksperto ta kombiná teknologia

inovadó ku un profundo konosementu di área pa asina ofresé:

• Transformashon Gubernamental: Impulsá efisiensia, efektividat i responsabilidat den prestashon di  servisio públiko pa empresa- i siudadanonan.

• Ekipá siudadanonan ku portalnan moderno di outo-servisio online i fasilitá un tumament’i desishon mas presis i prosesamentu transparente di nan kasonan.

• Oumento di Kumplimentu: Mihó servisio i imposishon ku ta produsí un mihó kumplimentu, resultando den mas entrada públiko i sostenibilidat fiskal.