Te ainda ta deskonosé si e mayor nan lo disidí di someté e resien nasí na un operashon.

NEW DELHI – Un beibi a nase ku 26 dede den e lokalidat di Bharatpur, ubiká na nort di India. E kaso a sorprendé famia nan, kende nan inkluso ta konsiderá ku ta trata aki di un reenkarnashon di un diosa.

Tabata via di ret nan sosial ku a publiká imágen di e menor di edat, unda a mustra ku e tin shete dede na kada man i seis na kada pia.

Dòkter nan a indiká ku el a nase ku un apnormalidat genétiko, yamá polidactilia, pero su mayor nan ta kere ku e ta e segundo binida di Dholagarh Devi, un diosa hindú.

Esaki ta keda representá komo un hóben ku vários brasa i tin un tèmpel hopi rekonosí, ku ta serka di e lugá di nasementu di e beibi.

E mama di e menor di edat, Sarju Devi, di 25 aña di edat, a mustra su mes emoshoná pa e kaso. E ruman di e hóben a indiká na medio nan di komunikashon, ku esaki a duna lugá na un beibi ku 26 dede i ta super felis konsiderando e regreso di e diosa.

E tata di e resien nasí, Gopal Bhattacharya, un elemento di Forsa Polisial di Reserva Sentral, tambe a kompartí ku e ta felis pa nasementu di su yu muhé.

Te ainda ta deskonosé si e mayor nan lo disidí pa e beibi keda someté na un operashon pa redusí su dede nan, pues no tin nada ku por komprometé su salú.

E echo di tin 26 dede, no ta kousa ningun tipo di daño, pero ta un apnormalidat genétiko. E mucha muhé, pa tur kos sobrá, ta gosa di un salú perfekto.